Бухорода Telegram орқали фуқароларни чув туширган 17 ёшли йигит қўлга олинди. Бу ҳақда Ички ишлар вазирлиги хабар қилди.
Қайд этилишича, 2025 йилнинг ноябрь ойида икки нафар фуқаро трейдинг курсларини ўрганиш ва пулларини бир неча баробар кўпайтириш илинжида профессионал админга мурожаат қилган. Оқибатда бири 13 миллион сўмдан ортиқ, иккинчиси эса 10 миллион сўм маблағини фирибгарга кўрсатган банк картасига ўтказиб берган.
Пул тушиши билан фирибгар мижозларни қора рўйхатга тиқиб, мулоқотни узиб қўйган.
Аниқланишича, кенг кўламли фирибгарлик схемасини эндигина мактабни тугатган, вояга етмаган 17 ёшли йигит ташкил қилган.
У Қашқадарё вилоятида яшириниб юрган чоғида қўлга тушди. Ўсмир қўлга олинганда, унинг ёнидан ашёвий далил сифатида телефон ва банк карталари олинган.
Telegram’даги каналида 2800 га яқин аъзоси бўлган ушбу шахс, аллақачон 280 дан ортиқ кишини алдаб, сўнгра уларни блоклаб юборгани маълум бўлди.
Ҳозирда гумонланувчига нисбатан Жиноят кодексининг тегишли моддалари билан иш очилиб, унинг бошқа яширин жиноятларини фош этиш бўйича тергов ҳаракатлари давом эттирилмоқда.
