АҚШнинг 96 ёшли фуқароси Лиллиан Дрониак TikTok’да машҳурликка эришиб, 15 миллион обуначи тўплади. У ўз видеоларида кундалик ҳаёти, учрашувлари, дугоналари билан базмлари ҳақида ҳикоя қилади ва муносабатларга оид маслаҳатлар беради. Бу ҳақда Bild ёзмоқда.
Ижтимоий тармоқдан топаётган даромади унга Коннектикут штатидаги қариялар уйида яшаш харажатларини мустақил қоплаш имконини бермоқда. Қариялар уйида бир ой яшаш нархи 10 минг доллардан ошади.
Яқинда эса Дрониак дугоналари билан тез-тез шовқинли базмлар уюштиргани сабабли қариялар уйидан ҳайдалиш хавфи остида қолди. Бунга жавобан у ҳеч ким унга кўнгилхушлик қилишни тақиқлай олмаслигини айтди.
Охир-оқибат, муассаса маъмурияти билан келишувга эришилди: базмлар ўтказишга рухсат берилди, бироқ хонасида спиртли ичимликлар ичиш тақиқланди.
BBC маълумотларига кўра, аёл йирик компаниялар, жумладан, косметика ишлаб чиқарувчилари билан тузилган реклама шартномалари орқали даромад олади. У пулининг бир қисмини чеварасининг таълими учун ҳам жамғариб бормоқда.
Видеоларни суратга олиш ва монтаж қилишда унга баъзан набираси ёрдам беради. Бироқ роликлар учун ғояларни Лиллиан Дрониакнинг ўзи ўйлаб топади.
“Мен доим машҳур бўлиш учун барча керакли фазилатларга эга эканимни билардим. Фақат бу 90 ёшдан кейин содир бўлишини хаёлимга ҳам келтирмагандим”, дейди у.
