Жинсий тажовузга оид жиноятлар тергови эндиликда прокуратура органлари томонидан амалга оширилади. Бу ҳақда кеча, 4 март куни қабул қилинган “Аёллар ва болалар ҳуқуқларининг ҳимоясини кучайтириш ҳамда уларга нисбатан тазйиқ ва зўравонлик ҳолатларининг олдини олиш бўйича қўшимча ташкилий-ҳуқуқий чоралар тўғрисида”ги Президент фармонида сўз боради.
Унга мувофиқ, эндиликда Жиноят кодексининг қуйидаги моддалари билан боғлиқ ишлар бўйича терговга қадар текширув ва дастлабки тергов фақат прокуратура органлари томонидан амалга оширилади:
118-модда — номусга тегиш;
119-модда — жинсий эҳтиёжни зўрлик билан ғайритабиий усулда қондириш;
121-модда — шахсни жинсий алоқа қилишга мажбур этиш;
128-модда — 16 ёшга тўлмаган шахс билан жинсий алоқа қилиш;
128.1-modda — 16–18 ёшдаги шахсни моддий ёки бошқа тарзда манфаатдор қилиб, жинсий алоқага жалб қилиш;
129-модда — 16 ёшга тўлмаган шахсга нисбатан уятсиз-бузуқ ҳаракатлар қилиш.
Бундан ташқари, вояга етмаган шахсга нисбатан содир этилган шаҳвоний шилқимлик бўйича маъмурий ҳуқуқбузарликлар фақат прокурор томонидан жиноят аломатлари йўқлиги тўғрисида қарор қабул қилгандан кейин судга юборилади. Бу тартиб жиноят аломатлари мавжуд бўлмаган ҳолатларда ноаниқлик ва адолатсизликка йўл қўймасликка ёрдам беради.
Шунингдек, 2027 йил 1 январдан бошлаб аёллар ва болаларга нисбатан тазйиқ ва зўравонлик билан боғлиқ жиноятлар махсус тайёргарликдан ўтган терговчилар томонидан тергов қилинади ва судьялар томонидан кўриб чиқилади.
