Олимлар Канадада тахминан 307 миллион йил олдин яшаган илк ўтхўр ҳайвонлардан бирининг қолдиқларини топди. Бу ҳақда Reuters агентлиги хабар берди.
“Канаданинг Янги Шотландия вилоятида олимлар тахминан 307 миллион йил аввал яшаган мавжудот бош суягини топди. Бу ўсимлик билан озиқланган, энг қадимги, қуруқликдаги, умуртқалилардан бири бўлиб, ҳайвонлар эволюциясида бурилиш нуқтаси ҳисобланади”, дейилади хабарда.
Жониворга Tyrannoroter heberti деб ном берилган. Tyrannoroter ташқи кўринишидан судралиб юрувчиларга ўхшаса-да, аслида у ҳайвонларнинг бу синфига кирмайди, балки микрозаврларга мансуб. Тадқиқотчиларнинг тахминига кўра, жонивор узунлиги 30,5 см атрофида бўлиб, ҳозирги калтакесакларга ўхшаш бўлган.
Тадқиқотчилар микрокомпютер томографияси ёрдамида тиш тизимини ўрганиб, ҳайвоннинг ривожланган чайнаш механизмига эга эканини аниқлади.
