Давлат хавфсизлик хизмати Божхона ва Ички ишлар органлари ходимлари ҳамкорлигида гиёҳвандлик воситалари савдосига қарши ўтказилган яна бир неча тезкор тадбирлар ҳақида маълумот берди.
Тошкент шаҳрида ўтказилган тезкор тадбирда хориждан курерлик жўнатмаси орқали қандолат маҳсулотлари орасига яширган ҳолда юборилган 350 грамм “лефедрон” синтетик наркотик моддасини қабул қилиб олган вақтида Чилонзор туманида яшовчи, 2006-йилда туғилган шахс ушланган. Сўнгра тезкор тадбир давом эттирилиб, унинг шериги бўлган – Яшнобод туманида яшовчи, 1991-йилда туғилган шахс ҳам жиноят устида қўлга олинган.
Аниқланишича, мазкур фуқаро ўзининг яшаш хонадонида нарколаборатория ташкил қилган бўлиб, ундан тахминий оғирлиги 5,3 килограмм бўлган синтетик гиёҳванд моддалар, гашиш ва марихуана мойларига ўхшаш моддалар, электрон тарозилар, колба идишлар, уяли алоқа воситалари ва лабораторияда фойдаланиладиган мосламалар ашёвий далил сифатида олинган.
Андижон вилоятида ўтказилган тезкор тадбирда Хўжаобод тумани ҳудудида ҳаракатланаётган, Тошкент вилоятининг Юқори Чирчиқ туманида яшовчи, 1991-йилда туғилган, муқаддам судланган шахсга тегишли автомобиль тўхтатилиб, кўздан кечирилганда унинг салон қисмида 6 дона полиэтилен ўрамларда бўлган, жами 5 килограмм 946 грамм “мефедрон” синтетик гиёҳвандлик воситаси борлиги аниқланган. Маълум бўлишича, у ушбу гиёҳвандлик воситасини наркокурерлар томонидан “закладка” тарзида қолдирилган жойдан олиб, Тошкент шаҳрига кетаётган бўлган.
ДХХ Наманган вилояти бўйича бошқармаси ҳамда Ички ишлар ва Божхона органлари ҳамкорлигида ўтказилган тезкор тадбирда, Фарғона вилоятининг Бувайда туманида яшовчи, 1981-йилда туғилган, муқаддам судланган шахс Қирғизистондан Андижон вилоятига ноқонуний олиб ўтилган 1 килограмм 23 грамм героин моддасини шартли харидорга 18 500 долларга сотган вақтида қўлга олинган.
Сирдарё вилоятида қайд этилган ҳолатда, Сурхондарё вилоятининг Денов туманида яшовчи, 1993, 1996 ва 1997-йилларда туғилган 3 нафар шахс кетаётган автомобиль Давлат хавфсизлик хизмати, Ички ишлар ҳамда Божхона органлари ходимлари ҳамкорлигида Сайхунобод туманидаги “Сайхун” ЙПХ масканида тўхтатилиб, холислар иштирокида кўздан кечирилганда автомашинанинг эшик қисмидаги хуфиёна жойга 2516 дона “Регапен” номли кучли таъсир қилувчи дори воситалари яширилгани аниқланган.
Маълум бўлишича, улар ушбу дори воситаларини муқаддам курерлар томонидан Қўқон шаҳридаги “закладка” тарзида қолдирилган жойдан олган.
Ҳозирда барча ҳолатлар юзасидан қонунбузарларга нисбатан жиноят ишлари қўзғатилиб, тергов ҳаракатлари олиб борилмоқда.
