Украина Россиянинг урушни тугатиш бўйича талабларидаги энг оғир ён беришга — Донецк вилоятидаги айрим ҳудудлардан воз кечишга рози бўлиши мумкин. Бу ҳақда президент Владимир Зеленскийнинг икки маслаҳатчисига таяниб The Atlantic нашри хабар берди.
Келишувга қонуний мақом бериш мақсадида Киевда баҳорда референдум ўтказиш эҳтимоли кўриб чиқилмоқда. Унда фуқароларга ҳудудий ён беришларни ўз ичига олган тинчлик режасини қўллаб-қувватлаш ёки рад этиш таклиф қилиниши мумкин.
Президент офиси раҳбари Кирилл Буданов Донбассдан қўшинларни олиб чиқишнинг ҳуқуқий ва амалий жиҳатлари бўйича маслаҳатчилар билан муҳокама олиб бормоқда.
“Улар тарк этилган ҳудудларга Россия қўшинлари кирмаслигини таъминлаш ва аҳолини бундай битимни қабул қилишга ишонтириш йўлларини излаяпти”, деди суҳбатдошлардан бири.
Зеленскийнинг ўзи The Atlantic нашрига берган интервьюсида референдумнинг президентлик сайлови билан бир вақтда ўтказилиши мумкинлигини тасдиқлади. Бироқ бу “яхши битим” бўлиши кераклигини қатъий таъкидлади.
Президентнинг фикрича, тинчлик сари қўйиладиган асосий қадам — АҚШ ва Европа томонидан Украинани келажакда Россиянинг эҳтимолий ҳужумидан ҳимоя қиладиган хавфсизлик кафолатларидир. Акс ҳолда Россияга янги босқинга тайёргарлик кўриши мумкин.
Абу Дабида ўтган Россия–Украина музокараларининг сўнгги раундида ҳудудий масала натижасиз якунланди. Россия Европа қўшинларининг Украина ҳудудига жойлаштирилишига рози эканини очиқ билдираётгани ҳам йўқ.
“Аммо украиналиклар вақт тугаётганини ҳис қилмоқда”, деб ёзади The Atlantic.
АҚШда яқинлашиб келаётган сайловолди кампанияси мавсуми Дональд Трампнинг эътиборини тобора кўпроқ жалб қилмоқда ва у музокараларни ўзи учун сиёсий мағлубият деб баҳолаши мумкин.
“Трамп муваффақиятсизлик учун айбни дипломатларга, Москвага, Киевга ёки можаронинг ҳар икки томонига юклаб, музокаралар жараёнидан чиқиб кетиши эҳтимоли бор”, дейилади хабарда.
