Кеча, 28 июнь куни Покистон хавфсизлик кучлари Покистон – Афғонистон чегарасида қуруқлик ва ҳаводан махсус амалиёт ўтказиб, камида 29 нафар жангарини йўқ қилди. Бу ҳақда Покистон Ахборот вазири Аттауллоҳ Тарар ўзининг X ижтимоий тармоғидаги саҳифасида маълум қилди.
Аттауллоҳ Тарарнинг ёзишича, қуруқликдаги операциялар давомида “Жамоат ул-Аҳрор” гуруҳига алоқадор тўрт нафар жангари ўлдирилган. Унинг айтишича, Афғонистоннинг Пактия, Пактика ва Кунар вилоятларидаги учта нишонга берилган ҳаво зарбалари оқибатида яна 25 нафар жангари ҳамда катта миқдордаги қурол-яроғ ва ўқ-дорилар йўқ қилинган.
Афғонистондаги “Толибон” муваққат ҳукумати расмий вакили Забиҳуллоҳ Мужоҳид ҳам Покистон ҳаво ҳужумлари оқибатида ўнлаб одамлар ҳалок бўлгани ва жароҳатланганини маълум қилган.
“Ҳужумлар оқибатида ўнлаб тинч аҳоли, жумладан, аёллар ва болалар ҳалок бўлди ҳамда жароҳатланди. Биз бу қўрқоқона тажовузни қатъий қоралаймиз ва уни жиноят ҳамда шафқатсизлик ҳаракати деб ҳисоблаймиз”, деган Мужоҳид.
Покистон томони эса операциялар мамлакатда сўнгги вақтларда содир этилган бир қатор террорчилик ҳужумларига жавоб сифатида амалга оширилганини билдирган. Маълум қилинишича, 27 июнь куни “Жамоат ул-Аҳрор” гуруҳи Карачи шаҳридаги Синд рейнжерлари объектига бомба ва қуролли ҳужум уюштирган. Ҳужум оқибатида уч нафар ҳарбийлаштирилган кучлар ходими ҳалок бўлиб, яна тўрт киши жароҳатланган.
Маълумот ўрнида, Исломобод Қобулни Покистон ҳудудида ҳужумлар режалаштираётган жангариларга бошпана бераётганликда айблаб келади. “Толибон” ҳукумати эса бу айбловларни рад этиб, қуролли гуруҳлар фаолияти Покистоннинг ички муаммоси эканини таъкидламоқда.
