БМТ Бош Ассамблеяси Исроилнинг Фаластин ҳудудида 1967-йилдан кейин бошланган истилосига чек қўйишни талаб қилувчи ва икки давлат ечимини қўллаб-қувватловчи резолюцияни қабул қилди. Бу ҳақда ташкилотга таяниб, Anadolu хабар берди.
“Фаластин масаласини тинч йўл билан ҳал этиш” деб номланган ушбу резолюция лойиҳаси Жибути, Иордания, Мавритания, Қатар, Сенегал ва Фаластин томонидан тайёрланган ва Бош Ассамблеяда овозга қўйилган. Ҳужжатни расмийлаштиришда:
- 151 та давлат ёқлаб овоз берган;
- 11 давлат жумладан, Исроил ва АҚШ қарши овоз берган;
- ва 11 давлат бетараф қолган.
Қабул қилинган ҳужжат қуйидагиларни талаб қилади:
1. Исроилнинг 1967-йилдан бери босиб олинган барча Фаластин ҳудудларидан (Шарқий Қуддус ҳам) чиқиб кетиши.
2. Аҳолини жойлаштириш (қўрғонлар қуриш) фаолиятига чек қўйиш ва Исроилнинг халқаро ҳуқуққа риоя этиши.
3. Фаластин халқининг ажралмас ҳуқуқлари, аввало, ўз тақдирини ўзи белгилаш ва мустақил давлат ташкил этиш ҳуқуқини рўёбга чиқаришни таъминлаш.
4. Гуманитар инқироз фонида фаластинликларга ёрдамни кучайтириш ва чегараларнинг ўзгаришини тан олмаслик.
5. Ғазо секторида демографик ёки ҳудудий ўзгаришларга уринишларнинг ҳар қандай шаклини рад этиш ва Ғазо Фаластин ҳудудларининг ажралмас қисми эканини таъкидлаш.
Маълумот ўрнида, БМТ Бош Ассамблеяси резолюциялари юридик жиҳатдан мажбурий эмас, аммо улар халқаро ҳамжамият фикрининг муҳим акс-садоси ҳисобланади.
Туркия резолюциянинг амалга оширилишига чақирди
Овоз беришдан олдин Бош Ассамблеяда сўзга чиққан Туркиянинг БМТдаги доимий вакили Аҳмет Йилдиз Анқаранинг Фаластин масаласини тинч йўл билан ҳал қилиш бўйича резолюцияни қўллаб-қувватлашини билдирган ва барча аъзо давлатларни қабул қилинган қарорларни фаол равишда амалга оширишга чақирган.
“Туркия воситачи сифатида, ўт очишни тўхтатиш битимларининг, жумладан, БМТ Хавфсизлик Кенгашининг 2803-резолюцияси ва 20 банддан иборат тинчлик режасининг тўлиқ ва виждонан бажарилишига чақиради”, деган Йилдиз.
