Жиззах вилояти Зафаробод тумани ҳокими Ғайратжон Эшпўлатов иштирокида юз берган ЙТҲ юзасидан “FocusNews_uz” QALAMPIR.UZга таяниб дастлабки тафсилотларни эълон қилганди. Тумани ҳокимлиги ҳолат юзасидан расмий муносабат билдирди.
Расмий ахборотга кўра, ҳодиса 2026 йил 30 август куни соат 07:45 ларда Зафаробод тумани “Нурафшон” МФЙ ҳудудидан ўтувчи йўлда содир бўлган. “МАЗ” юк машинаси чап томонга бурилиш вақтида қарама-қарши йўналишда ҳаракатланиб келаётган Зафаробод тумани ҳокими бошқарувидаги КИА Seltos хизмат автомашинаси йўлига чиқиб кетган ва оқибатда тўқнашув юзага келган.
Тармоқларда машинани ҳокимнинг ўғли бошқаргани ҳақида хабарлар тарқалган эди. Расмий баёнотда эса автомобилни туман ҳокимининг ўзи бошқаргани, йўловчи сифатида унинг вояга етмаган ўғли бўлгани кўрсатилган.
ЙТҲ оқибатида туман ҳокими Эшпўлатов ва унинг вояга етмаган ўғли турли даражадаги тан жароҳатлари билан Республика шошилинч тиббий ёрдам илмий маркази Жиззах филиалининг жонлантириш бўлимига ётқизилган. Ўғлининг ҳам оёғи сингани, бироқ аҳволи яхшилиги айтилганди. Юк машинаси ҳайдовчиси Б. Мўминов эса тан жароҳати олмаган.
Мазкур ҳолат юзасидан Зафаробод туман прокуратураси томонидан Жиноят кодексининг 266-моддаси 1-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган бўлиб, ҳозирда дастлабки тергов ҳаракатлари олиб борилмоқда.
