Тадбиркор Илон Маскнинг айтишича, атиги 20 йил ичида инсонлар ўз онгларини роботларга кўчириш орқали хотира ва шахсиятини сунъий танага кўчириш имконига эга бўлиши мумкин. Бу ҳақда у “Lex Fridman” подкастида гапирди.
Маск бундай технология инсониятни “рақамли абадийликка” яқинлаштириши мумкинлигини таъкидлаган.
У бу ғояни ўз лойиҳалари – мия ва компьютер ўртасидаги алоқа устида ишловчи Neuralink стартапи ҳамда инсон шаклидаги роботлар яратишга қаратилган Tesla Optimus дастури билан боғлаган. Маскнинг сўзларига кўра, агар жараён хавфсиз бўлса ва хотираларни сақлаш ёки ақлий имкониятларни кенгайтириш имконини берса, кўпчилик бунга рози бўлади.
Аслида бу инсоннинг онгини машина билан бирлаштириш ёки тўлиқ сунъий танага кўчириш ҳақида. Маск бундай технологиялар одамга жисмоний ўлимдан кейин ҳам мавжуд бўлиш имконини беришини, бироқ бу ҳозирча узоқ истиқбол эканини айтган.
Мутахассислар эса “онгни юклаш” ғояси олдида ҳануз илмий тўсиқлар кўплигини таъкидламоқда. Уларнинг фикрича, инсон онгини рақамли шаклга тўлиқ ўтказиш қандай амалга оширилиши ҳали номаълум. Шунингдек, шахс ҳуқуқлари ва онгга аралашиш хавфлари каби саволлар очиқ қолмоқда.
Шунга қарамай, Маск нейротехнологиялар ва робототехника ривожи инсон ва машина бирлашуви даврини тобора яқинлаштираётганига ишонади.
