Туркияда ҳибсда сақланаётган Ўзбекистон фуқаросига консуллик ёрдами кўрсатилди. Бу ҳақда Бош консулхона ахборот хизмати хабар берди.
Туркияда оғир ҳаётий вазиятга тушиб қолган ватандошларга зарур консуллик-ҳуқуқий ёрдам кўрсатиш чоралари доирасида Ўзбекистон Бош консулхонаси дипломатлари 16 октябрь куни Сакаря вилоятидаги жазони ижро этиш муассасасига ташриф буюрди.
Ташриф давомида ҳибсда сақланаётган бир қатор Ўзбекистон фуқаролари билан консуллик учрашувлари ўтказилиб, уларга зарур ҳуқуқий маслаҳатлар берилди. Шунингдек, уларни ҳимоя қилаётган адвокатлар билан ҳам алоҳида маслаҳатлашувлар ўтказилди.
Гиёҳвандлик воситалари ва психотроп моддаларни сақлашда гумонланиб, 2024 йилдан буён Сакаря вилоятидаги жазони ижро этиш муассасасида сақланиб келган Ўзбекистон фуқароси Ф.А. бўйича суд жараёни якунланди.
Бош консулхона маълумотига кўра, 30 октябрь куни бўлиб ўтган навбатдаги суд мажлиси қарорига асосан фуқаро Ф.А. суд залидан озодликка чиқарилган.
16 октябрь куни Туркияда қамоқда гумонланувчи сифатида сақланаётган ўзбекистонлик озод қилинган эди. Истанбул шаҳрининг Бакиркўй туманида жойлашган оғир жиноятлар бўйича 17-суд биносида асли Самарқанд вилоятидан бўлган 22 ёшли Ўзбекистон фуқаросининг иши юзасидан навбатдаги (учинчи) суд мажлиси бўлиб ўтган. Суд жараёнида Бош консулхона дипломатлари ҳам иштирок этди. Мазкур иш доирасида фуқарога нисбатан ноқонуний наркотик моддаларни олиб кириш ва уларнинг айланмаси билан боғлиқ айбловлар кўриб чиқилган.
