Кеча, 12 ноябрь куни Сурхондарё вилоятининг Термиз шаҳридаги “Санъат саройи” мажмуасида Ўзбекистон халқ шоири Усмон Азимнинг 75 йиллиги кенг нишонланди ва шоирга Президент Шавкат Мирзиёев номидан 3 хонали уй совға қилинди.
Шоирнинг юбилей тадбирида Сурхондарё вилояти ҳокими Улуғбек Қосимов, Ўзбекистон Ёзувчилар уюшмаси раиси Сирожиддин Саййид ва бошқа бир қатор ижодкорлар иштирок этган.
Тадбирда вилоят раҳбари шоирни Сурхондарё аҳли номидан самимий табриклаб, унинг асарларида юртнинг гўзаллиги, халқ руҳи ва миллий қадриятлар чуқур ифода этилганини таъкидлаган. Шунингдек, Улуғбек Қосимов ҳамда Сирожиддин Саййид шоирга Президент совғаси – Термиз шаҳридаги 3 хонали уй калитини топширган.
Тадбир давомида ёзувчи ва ижодкорлар, ёшлар ҳамда жамоатчилик вакиллари шоир асарларидан намуналар ўқиган. Шу билан бирга, Усмон Азимнинг ҳаёти ва ижодига бағишланган видеолавҳалар намойиш этилган.
Маълумот учун, Ўзбекистон халқ шоири Усмон Азим 1950 йил 13 август куни Сурхондарё вилояти Бойсун туманида таваллуд топган. 1972 йилда Тошкент давлат университети – ҳозирги Мирзо Улуғбек номидаги Ўзбекистон Миллий университетининг журналистика факультетида таълим олган. У ўзининг “Инсонни тушуниш” номли илк китоби билан 1979 йилда адабий жамоатчилик эътиборига тушган. Шундан сўнг шоирнинг “Ҳолат”(1979), “Оқибат” (1980), “Кўзгу” (1983), “Сурат парчалари” (1985), “Дарс” (1985), “Иккинчи апрель” (1987), “Бахшиёна” (1989), “Ғаройиб аждарҳо” (1990), “Уйғониш азоби” (1991), “Ғусса” (1994), “Узун тун” (1994), “Бор экан-да, йўқ экан” (1995), “Сайланма” (1995), “Куз” (2001) каби шеърий ва “Жоду” (2003), “Адибнинг умри” (2010), “Сўнгсўзлар” (2020) насрий тўпламлари, наср ва назмдан иборат “Коллаж” (2018) насрий тўпламлари нашр этилган.
Қолаверса, Усмон Азим уч мингга яқин шеърий асарлар муаллифи саналади. У Грузиянинг Владимир Маяковский номидаги Давлат мукофотига сазовор бўлган (1982). “Дўстлик“ ордени (1998) билан мукофотланган. 2024 йил Усмон Азим Қозоғистоннинг адабиёт соҳасидаги халқаро “Алаш” мукофоти билан тақдирланган.
