АҚШнинг Нью Мексико штати суди Меtа корпорациясини ўз платформаларида болалар хавфсизлиги борасида фойдаланувчиларни алдаганликда айбдор деб топди ва 375 миллион доллар миқдорида жарима белгилади. Бу ҳақда BBC хабар берди.
Штат бош прокурори Рауль Торрес ушбу қарорни тарихий деб баҳолади. Сабаби бу АҚШ штатларидан бири Меtа компаниясини болалар хавфсизлиги масаласида судга бериб, ғалаба қозонган илк ҳолатдир.
Ҳакамлар ҳайъати хулосасига кўра, Facebook, Instagram ва WhatsApp эгаси бўлган Меtа ўз платформаларида болаларнинг шаҳвоний мазмундаги материаллар ва педофиллар билан тўқнаш келишига йўл қўйган.
Етти ҳафта давом этган суд жараёнида компаниянинг собиқ ходимлари ва ички ҳужжатларидан олинган далиллар тақдим этилди. Меtа’нинг собиқ муҳандислик раҳбари Артуро Бежар судга Instagram’даги тажрибаларини сўзлаб берди. Унинг айтишича, платформа алгоритмлари вояга етмаганларга жинсий мазмундаги контентни таклиф қилган. Ҳатто Бежарнинг ўз қизига ҳам Instagram’да нотаниш шахс томонидан жинсий алоқа таклиф қилинган.
Меtа’нинг ички тадқиқотларига кўра, Instagram фойдаланувчиларининг 16 фоизи бир ҳафта ичида исталмаган “очиқ” кадрлар ёки жинсий алоқа акс этган контентни кўрганини маълум қилган.
Алгоритмлар айбдорми?
Нью Мексико штати 2023 йилда Меtа’ни судга бериб, компания ўзининг тавсия алгоритмлари орқали ёш фойдаланувчиларни жинсий контент ва ҳатто одам савдоси билан боғлиқ материаллар томон йўналтирганини таъкидлаган.
“Меtа раҳбарлари ўз маҳсулотлари болаларга зарар етказишини билган, ўз ходимларининг огоҳлантиришларига эътибор бермаган ва ҳақиқатни жамоатчиликдан яширган”, деди прокурор Торрес.
Марк Цукерберг раҳбарлигидаги компания вакили ҳукмга қўшилмаслигини ва апелляция бериш ниятида эканини билдирди.
“Биз платформаларимизда хавфсизликни таъминлаш учун қаттиқ меҳнат қиламиз. Ўсмирларни ҳимоя қилиш борасидаги тажрибамизга ишончимиз комил”, деди у.
Компания 2024 йилда ёшлар учун Тeen Accounts функциясини ишга туширганини ва ота-оналар учун назорат воситаларини кенгайтирганини ўзини оқлаш далили сифатида келтирган.
Мазкур 375 миллион долларлик жарима Нью Мексиконинг “Адолатсиз амалиётлар тўғрисида”ги қонунининг минглаб марта бузилгани (ҳар бир қоидабузарлик учун 5000 доллар) учун белгиланди.
Айни дамда Лос Анжелесда ҳам Меtа’га қарши бошқа бир йирик суд жараёни кетмоқда. Унда ёш бир аёл Instagram ва YouTube каби платформалар болаликдан унинг руҳиятида қарамлик келтириб чиқарганини даъво қилмоқда. Ҳозирда АҚШ судларида ижтимоий тармоқларга қарши минглаб шунга ўхшаш даъволар кўриб чиқилмоқда.
