Тожикистон Афғонистон билан муносабатларни ўз миллий манфаатларини ҳимоя қилиш тамойилига асосланиб, олиб бормоқда. Бу ҳақда мамлакат ташқи ишлар вазири Сирожиддин Муҳриддин баёнотига таяниб AsiaPlus хабар берди.
“Биз ҳар бир суверен давлат ўз сиёсатини ўз миллий манфаатларига мувофиқ олиб бориш ҳуқуқига эга, деб ҳисоблаймиз. Шу ўринда, кўплаб давлатлар, жумладан, Афғонистон билан чегарадошлар ҳам ўз миллий манфаатларидан келиб чиққан ҳолда у билан ҳамкорликни йўлга қўймоқда”, деди у.
Вазир Тожикистон Афғонистон билан чегарадаги бозорлар фаолиятини қайта тиклагани ва қўшни давлатга электр энергияси етказиб беришни давом эттираётганини айтди. У икки томонлама товар айирбошлаш ҳажми ўсиб бораётгани ва 2025 йил якунига кўра, 110 миллион доллардан ошганини таъкидлади.
Сирожиддин Муҳриддин, шунингдек, Тожикистон минтақанинг ижтимоий-иқтисодий муаммоларини ҳал қилишга қаратилган халқаро ҳамкорликни олқишлашини айтди ва мураккаб гуманитар вазиятда Афғонистонни ёлғиз қолдирмасликка чақирди.
“Афғонистон бўйича позициямиз ўзгаришсиз қолмоқда. Биз Афғонистонни хавфсиз, барқарор, тинч ва гуллаб-яшнаётган мамлакат сифатида кўришни истаймиз”, деди у.
2024—2025 йилларда Душанбе Афғонистонга вайронкор зилзиладан сўнг 6 минг тоннадан ортиқ гуманитар ёрдам юборди.
Вазир сўнгги икки ой ичида Афғонистон билан чегарада қуролли ҳужумлар кўпайганини изоҳлар экан, икки давлат чегарадаги ҳодисаларнинг олдини олиш учун биргаликда ҳаракат қилаётганини айтди. Афғонистон “чегарада бундай ҳолатлар такрорланмаслиги учун зарур чораларни кўришини ва ҳар томонлама текширув ўтказишини” билдирган.
“Тожик-афғон чегарасида хавфсизликни таъминлаш масалалари ҳамон долзарблигича қолмоқда. Шу мақсадда, албатта, Тожикистон ва Афғонистоннинг тегишли тузилмалари ўртасида ишчи алоқалар ўрнатилган”, деди вазир.
Яқинда Тожикистон Чегара қўшинлари мамлакат ҳудудига ноқонуний кириб келган “беш нафар афғон контрабандачи”ни аниқлаганди. Уларнинг “қуролли қаршилиги” оқибатида уч нафар контрабандачи йўқ қилинган, яна икки нафари Афғонистон ҳудудига қочиб кетган.
2025 йил 26 ва 30 ноябрь кунлари Афғонистон ҳудудидан Тожикистоннинг чегараолди ҳудудларига қилинган икки ҳужум оқибатида беш нафар Хитой фуқароси ҳалок бўлган, яна беш киши жароҳат олган эди.
Тожикистон ушбу ҳужумларни кескин қоралаб, “Толибон”дан айбдорларни қўлга олишни талаб қилган. “Толибон” ҳукуматининг ташқи ишлар вазирлиги эса ҳужумлар “минтақа давлатлари ўртасида беқарорлик ва ишончсизликни келтириб чиқариш”ни мақсад қилган гуруҳлар томонидан амалга оширилганини билдирган.
Тожикистон Гиёҳванд моддаларни назорат қилиш агентлиги директори Зафар Самад маълумотига кўра, 2025 йили тожик-афғон чегарасида Тожикистон куч тузилмалари ва афғон контрабандачилари ўртасида 17 та қуролли тўқнашув (2024 йилда — 6 та) қайд этилган. Ушбу ҳодисалар оқибатида 10 нафар Афғонистон фуқароси (2024 йилда — 3 нафар) ва 2 нафар тожик чегарачиси ҳалок бўлган.
