Ўзбекистоннинг Владивосток шаҳридаги Бош консулхонаси дипломатлари Россиянинг Сахалин вилоятига ташриф буюриб, 1-сонли жазони ижро этиш муассасасида сақланаётган ўзбекистонликлар билан учрашди. Бу ҳақда “Дунё” хабар берди.
Маълумотларга кўра, ҳозирда мазкур муассасада 11 нафар Ўзбекистон фуқароси Россия Жиноят кодексининг тегишли моддалари бўйича жазо ўтамоқда.
Ташриф давомида дипломатлар маҳкумлар учун яратилган шароитлар, жумладан турар жойлар, умумий овқатланиш ва дам олиш хоналари билан танишди. Шунингдек, улар билан мулоқот ўтказилган.
Улар билан суҳбат давомида маҳкумлар муасассадаги шароитлардан қониқиш билдиргани, бироқ яқинларини соғингани сабабли жазонинг қолган қисмини Ўзбекистонда ўташ истагини билдирган. Улар суд томонидан белгиланган муддатнинг қолган қисмини мамлакатдаги жазони ижро этиш муассасаларига кўчириш бўйича амалий ёрдам сўраган.
Дипломатлар эса Россия ва Ўзбекистон ўртасида маҳкумларни ўзаро топшириш бўйича алоҳида шартнома мавжуд эмаслиги сабабли, ҳозирча бундай имконият йўқлигини маълум қилган.
Шу билан бирга, суҳбат давомида маҳкумларнинг ҳолати ўрганилиб, уларга нисбатан мажбурий меҳнат, қийноқ ёки босим ҳолатлари мавжуд ёки йўқлиги ҳам муҳокама қилинган. Ўзбекистонликлар бундай ҳолатлар кузатилмаганини билдирган.
Шунингдек, улар Россия Мудофаа вазирлиги вакиллари томонидан вақти-вақти билан ҳарбий хизматга жалб этиш бўйича таклифлар берилаётгани ҳақида ҳам маълумот берган, бироқ бундай жараёнларда иштирок этишга мажбурлаш ҳолатлари йўқлигини айтган.
Ташриф якунида Ўзбекистон фуқароларига Бош консулхона манзиллари ва алоқа рақамлари тақдим этилган ҳамда зарурат туғилганда мурожаат қилишлари мумкинлиги билдирилган.
