АҚШнинг Эронга қарши уруши ҳозиргача 25 миллиард долларга тушди. Бу ҳақда кеча, 29 апрель куни Пентагоннинг юқори лавозимли амалдори маълум қилди ва бу можаронинг ҳарбий харажатлари бўйича илк расмий баёнот бўлди.
Ноябрь ойида бўлиб ўтадиган оралиқ сайловларга олти ой қолган бир пайтда, Президент Дональд Трампнинг республикачилари Конгрессдаги кўпчилик тарафдорларини сақлаб қолиш учун қийин кураш олиб бориши кутилмоқда. Демократлар эса жамоатчилик фикридаги рейтингларда устунликка эга бўлиб, Эрон уруши масаласини иқтисодий қийинчиликлар билан боғлашга ҳаракат қилмоқда.
Молиявий назоратчи вазифасини бажараётган Жулс Ҳёрст Конгресснинг Қуролли кучлар қўмитаси аъзоларига айтишича, бу маблағнинг асосий қисми ўқ-дориларга сарфланган. Ҳёрст ушбу ҳисоб-китоб нималарни ўз ичига олгани, жумладан, Яқин Шарқдаги база инфратузилмасини қайта тиклаш ва таъмирлаш харажатлари киритилган ёки киритилмагани ҳақида аниқ маълумот бермаган.
“Сўровга жавоб берганингиздан хурсандман. Чунки биз бу рақамни анча вақтдан бери сўраб келётган эдик ва ҳеч ким очиқламаётганган эди”, дея муносабат билдирган қўмитадаги етакчи демократ Адам Смит.
Мудофаа вазири Пит Ҳегсет эса қонун чиқарувчиларга бу харажатлар Эроннинг ядровий қуролга эга бўлишининг олдини олиш мақсади билан оқланишини айтган.
“Эроннинг ядровий бомбага эга бўлмаслигини таъминлаш учун сиз қанча тўлар эдингиз? Қанча?”, деган у.
Ҳегсет, шунингдек, Эрон урушига нисбатан танқидларни рад этган ва демократларни кескин танқид қилган.
Маълумот ўрнида, 25 миллиард доллар – бу жорий йилдаги NASA бюджетига тенг. Бироқ Пентагон бу сумма хулосасига қандай келгани номаълум. Чунки ўтган ойда “Reuters” агентлигининг маълум қилишича, урушнинг дастлабки олти кунининг ўзи АҚШга камида 11,3 миллиард долларга тушган.
АҚШ 28 февралдан бошлаб Эронга қарши ҳужумларни амалга ошира бошлаган ва ҳозирда томонлар вақтинчалик ўт очишни тўхтатиш ҳолатида турибди. Пентагон Яқин Шарққа қўшимча ўн минглаб ҳарбийларни жўнатган. Можарода 13 нафар америкалик ҳарбий ҳалок бўлган, юзлаб аскарлар жароҳат олган.
АҚШ сайловчилари учун ҳозирда нарх-наво масаласи энг муҳим омиллардан бири бўлиб қолмоқда. Уруш бошланганидан бери нефть ва газ етказиб беришдаги узилишлар бензин ва қишлоқ хўжалиги маҳсулотлари нархларининг ошишига олиб келган. Қўшма Штатлар учун бензин нархи сўнгги тўрт йилдаги энг юқори даражага чиққан.
Оралиқ сайловдан олдинги сўров натижаларига кўра, Трампнинг рейтинги ҳам пасайган бўлиб, америкаликларнинг атиги 34 фоизи Эронга қарши урушни қўллаб-қувватламоқда. Бу кўрсаткич апрель ўрталарида 36 фоиз, март ўрталарида эса 38 фоиз бўлган.
