Германия Федерал разведка хизмати (BND) Россия иқтисодиёти ва молиясига оид расмий маълумотлар ҳақиқатга мос келмаслигини маълум қилди. Бу ҳақда Deutsche Welle хабар берди.
“Россия рақамларни манипуляция қилиш орқали Украинага қарши ҳарбий тажовузнинг ҳақиқий харажатларини яширишга ҳаракат қилмоқда”, дея маълумот берди BND.
Германия разведка хизматига кўра, 2025 йилда Россия федерал бюджетининг ҳақиқий тақчиллиги расмий кўрсаткичлардан 2,36 триллион рублга (тахминан 26,18 миллиард евро) кўпроқни ташкил этган.
Урушнинг бешинчи йилига келиб, Россия иқтисодиётининг деярли барча тармоқларида пасайиш кузатилмоқда. Бунга 2022 йилдан буён жаҳон бозорида энергия ресурслари нархининг кескин тушиши, нефть-газ экспортидан келадиган даромадлар камайиши ҳамда Украинага босқин сабабли жорий этилган халқаро санкциялар сабаб бўлмоқда.
“Россия раҳбарияти урушнинг келгуси узоқ йиллар давомида сезиладиган оғир иқтисодий оқибатларига кўниб, ҳаракат қилмоқда”, дейилади ҳисоботда.
BND таҳлилига кўра, Россия ўзининг иқтисодий зарарларини яшираётгани сабабли инвестициялар учун ишончсиз ва кутилмаган хатарларга бой давлатга айланмоқда.
Германия разведкаси Россияга қарши янги санкциялар ва уларнинг қатъий ижроси Москвага бўлган босимни янада кучайтириб, йўқотишларини оширишини таъкидлади. Эҳтимолий чоралар сифатида учинчи давлатлардаги Москва тарафдорларига нисбатан чекловлар ўрнатиш ва Россия нефтини ташиш билан шуғулланувчи “сояли флот”га қарши қатъий чоралар кўриш таклиф қилинмоқда
