Япониянинг Аомори префектурасида парранда гриппи авж олгани сабабли 230 минг бош товуқ йўқ қилинади. Бу ҳақда “Kyodo” хабар берди.
Қайд этилишича, 32 та паррандачилик фабрикаси атрофида 10 километр радиусдаги тақиқланган ҳудудлар белгиланган. Ҳозирда Аомори префектураси ҳукумати 230 минг товуқни йўқ қилишга киришишга мажбур бўлмоқда.
Экспертлар касалликнинг тарқалиш эҳтимоли иқтисодиётга жиддий таъсир кўрсатиши мумкинлигидан хавотир билдирмоқда. Айниқса, 2023 йилги вазият бозорда оғир из қолдирган: ўшанда паррандаларнинг оммавий йўқ қилиниши Японияда товуқ тухуми нархининг 1991 йилдан бери рекорд даражада сакрашига олиб келган. Нархлар ўтган йилга нисбатан 76 фоизга ошган, бу эса истеъмолчилар орасида катта саросимага сабаб бўлган. Шу муносабат билан Токиодаги айрим супермаркетларда тухум сотиб олиш бўйича чекловлар жорий этилган.
Маълумот учун, парранда гриппи – асосан қушлар орасида тарқаладиган, лекин баъзи турлари инсонлар учун ҳам хавфли бўлган ўткир юқумли вирусли касалликдир. Вируснинг асосий ташувчилари ёввойи сув қушлари (ўрдак, ғозлар) ҳисобланади. Улар ўзлари касалланмаса-да, вирусни узоқ масофаларга ташийди. Уй паррандаларига (товуқ, курка) ёввойи қушларнинг чиқиндилари ёки ифлосланган сув ва озуқа орқали юқади.
