Россия ноябрь ойида Хитойга тарихдаги энг йирик ҳажмда — 961 миллион долларлик олтин етказиб берди. Бу ҳақда Хитой божхона маълумотларига таяниб, “РИА Новости” хабар берди.
Октябрь ойида етказиб берилган олтин ҳажми бир оз камроқ бўлиб, унинг умумий қиймати 930 миллион долларни ташкил этган. Умуман олганда, 2025 йилнинг 11 ойи давомида Хитойнинг Россиядан импорт қилган олтини 1,9 миллиард долларга тенг бўлган. Январь–сентябрь ойларида етказиб бериш ҳажми атиги 9 миллион доллар эди.
Таққослаш учун: 2024-йилнинг октябрь–ноябрь ойларида Россия Хитойга умуман олтин экспорт қилмаган, ўша йилдаги энг юқори кўрсаткич эса 223 миллион доллар билан чекланган.
- Bloomberg: Россиянинг Хитойга қимматбаҳо металлар экспорти кескин ошган
“РИА Новости” келтирган маълумотларга кўра, 2025-йилнинг дастлабки тўққиз ойида Россия Хитойга атиги 9 миллион долларлик олтин етказиб берган. Шу билан бирга, Bloomberg июль ойидаги материалида Россиянинг Хитойга қимматбаҳо металлар экспорти 2025-йилнинг биринчи ярмида деярли икки баравар ошиб, 1 миллиард долларга етгани қайд этилган.
Бу сумманинг қанчаси олтинга тўғри келиши аниқлаштирилмаган. Етказиб бериш ҳажмининг ошишида олтиннинг рекорд даражадаги нархлари ҳамда Хитой ички бозоридаги юқори талаб асосий омил ҳисобланади.
- Financial Times: Хитойнинг реал олтин харидлари расмий маълумотлардан анча юқори бўлиши мумкин
Ноябрь ўрталарида Financial Times газетаси таҳлилчилари Хитой Халқ банки эълон қилаётган олтин харидлари ҳажмига шубҳа билан қараётганини ёзди. Франциянинг Société Générale молиявий гуруҳи экспертлари эса Хитой 2025-йилда жами 250 тонна олтин сотиб олган бўлиши мумкинлигини айтди. Бу бошқа давлатлар марказий банклари умумий талабининг учдан бир қисмидан ҳам кўп.
