АҚШ Адлия вазирлиги жинсий зўравонлик жиноятларини содир этган Жеффри Эпштейн ишига оид минглаб ҳужжатларни ўз веб сайтидан олиб ташлади. Бунга жабрланувчиларнинг шахсий маълумотлари очиқлангани сабаб бўлди. Бу ҳақда BBC хабар берди.
Эпштейн жабрланувчиларининг адвокатлари ҳужжатларда айрим шахсий маълумотлар таҳрирланмагани ва бу қарийб 100 нафар жабрланувчининг ҳаётини хавф остига қўйганини айтди. Улар орасида электрон почта манзиллари ҳамда жабрланувчиларни аниқлаш мумкин бўлган яланғоч суратлар ҳам бўлган.
Жабрланувчилар буни “мутлақо қабул қилиб бўлмайдиган ҳолат” деб атади ва файллар “синчиклаб кўздан кечирилиши зарурлигини, уларнинг номи тилга олинмаслиги ва яна руҳий жароҳат етказилмаслиги кераклигини” таъкидлади. АҚШ Адлия вазирлиги шахсий маълумотлар ошкор бўлган барча ҳужжатлар олиб ташланганини, хатолар эса “техник ёки инсон омили” сабаб юзага келганини билдирди.
“Жабрланувчилар ёки адвокатлар томонидан ўчириш сўралган барча ҳужжатлар кейинги таҳрирлаш учун олиб ташланди”, дейди вазирлик.
Ҳозирда идора қўшимча таҳрир талаб этиши мумкин бўлган бошқа ҳужжатлар бор-йўқлигини текширмоқда. Жабрланувчиларни ҳимоя қилаётган икки нафар адвокат эса Нью Йоркдаги федерал судьядан ҳужжатлар жойлаштирилган сайтни ёпишни талаб қилганди. Улар бу ҳолатни “АҚШ тарихида бир кунда жабрланувчилар махфийлигини бузган энг оғир ҳолат” деб атаган.
Эпштейннинг бир нечта қурбонлари шахсий маълумотлар ошкор этилишини “ҳаёт учун хавфли” деб баҳолади. Яна бир жабрланувчи эса шахсий банк маълумотлари эълон қилинганидан сўнг унга ўлим билан таҳдид қилишганини айтди.
Аёллар ҳуқуқлари бўйича таниқли адвокат Глориа Аллред ҳам ҳужжатларда кўплаб жабрланувчиларнинг исмлари очиқ қолганини билдирди. Бу каби ҳолат Эпштейн билан ёзишмалари эълон қилинган ўзбекистонлик қизга оид ҳужжатларда ҳам кузатилган. Жумладан, унинг исми, яшаш манзили, телефон рақамлари ва электрон почта манзили очиқ кўринган. АҚШ Адлия вазирлиги мазкур маълумотларни яширмаган. Ҳужжатнинг фақат битта қисмида ўзбекистонлик қизнинг исми келтирилган.
“Баъзи ҳолларда исмлар устидан чизиқ тортилган, аммо барибир ўқиш мумкин. Бошқа ҳолатларда эса ҳеч қачон омма олдида чиқмаган, исмини ошкор қилмаган жабрланувчиларнинг суратлари берилган”, деди у.
АҚШ Адлия вазирлиги 30 январь куни Эпштейн ишига оид 3 миллион ҳужжат, 180 мингта расм ва 2 мингта видеони эълон қилди. Эпштейн 2019 йил 10 август куни Нью Йоркдаги қамоқхонада, вояга етмаганларни жинсий савдога жалб қилиш айбловлари бўйича судни кутаётган пайтда вафот этган.
