Афғонистоннинг Тахор провинцияси Чаҳи Аб туманида олтин қазиб олиш устида келиб чиққан тўқнашув оқибатида камида 4 киши ҳалок бўлди. Бу ҳақда Afghanistan International хабар берди.
4 қурбон ва 16 ярадор
Душанба, 5 январь, куни маҳаллий аҳоли ва “Толибон”га алоқадор олтин қазиб олувчи компания ўртасида низо келиб чиққан. Тўқнашувлар оқибатида:
- 3 нафар маҳаллий аҳоли вакили;
- ва компания хавфсизлик хизматининг бир нафар ходими ҳалок бўлган;
- камида 16 киши турли даражадаги жароҳатлар олган.
Маҳаллий аҳоли вакиллари Дара Фазел ҳудудидаги компания қароргоҳига бостириб кириб, иккита корхона биносини эгаллаб олган. Компания ходимлари воқеа жойидан қочишга мажбур бўлган, икки нафар қўриқчи эса намойишчилар томонидан асирга олинган.
Сабаб: Экологик зарар ва сув тақчиллиги
Маҳаллий аҳолининг норозилигига компанияларнинг олтин қазиб олишда экология қоидаларига риоя қилмаслиги ва сув манбаларининг кесиб қўйилиши сабаб бўлган. Шунингдек, аҳоли “низомсиз” ва “ноқонуний” қазиш ишларига қарши чиқмоқда.
Тарқалган видеоларда воқеа жойидан қора тутун кўтарилаётгани, намойишчилар компанияларга тегишли техника ва ускуналарга ўт қўйгани акс этган. Жума, 2 январь, кунидан бошланган зиддият тобора кескинлашиб бормоқда. Ўшанда бир гуруҳ одамлар “Толибон” жангчиларига тош отиб, олтин қазиб олишга қаршилик кўрсатганди.
“Толибон”нинг асосий ҳомийси билан боғлиқ шубҳали шартномалар
Маълумотларга кўра, норозиликка сабаб бўлган учта компания Башар Нурзай билан алоқадор. Нурзай йирик наркобарон ва “Толибон”нинг асосий молиявий ҳомийларидан бири сифатида танилган
Расмий муносабат
“Толибон”нинг Конлар ва нефть вазирлиги матбуот котиби Ҳумоюн Афғон 6 январь куни аудиобаёнот бериб, тўқнашувлар юз берганини тасдиқлади.
“Кончилар ва маҳаллий аҳоли ўртасидаги тўқнашувлар молиявий йўқотишлар ва қурбонларга сабаб бўлди. Вазиятни ўрганиш учун Тахор провинцияси расмийлари бошчилигидаги махсус делегация ҳудудга юборилган”, деди у.
Вазирлик вакили аниқ қурбонлар сонини очиқламади ва батафсил маълумот суриштирув якунлангач эълон қилинишини билдирди. Ҳозирда туманда вазият ўта таранглигича қолмоқда.
