Америкалик талаба ва машҳур спидкубер Томми Черри Рубик кубигини кўзи ёпилган ҳолда йиғиш бўйича Гиннес рекордини янгилади.
Маълумотларга кўра, у 3×3×3 ўлчамдаги рубик кубигини кўзи ёпилган ҳолда йиғиш бўйича ўртача вақт натижасини яхшилаган. Хитойда бўлиб ўтган Hefei August Open 2026 турнирида Черри мусобақа қоидаларига мувофиқ бир нечта уринишни амалга оширган.
Уларнинг натижаларига кўра, ўртача вақт 13,97 сонияни ташкил этган. Черри шу тариқа ўзидан аввалги 14,05 сониялик рекордни янгилаган. Мазкур рекордни австралиялик спидкубер Чарли Эггинс қайд этганди.
Черри бундан аввал ҳам рекорд ўрнатган. У АҚШнинг Нью Жерси штатида бўлиб ўтган Мid -Аtlantics Quit Championship мусобақасида кубикни кўзи боғланган ҳолда 11,56 сонияда йиғган. Бу натижа кубик юзларининг ҳолатини эслаб қолиш ва уни йиғиш учун сарфланган умумий вақтни ўз ичига олади.
Томми Черри 2005 йил 30 майда туғилган. У 2015 йил 30 июлда, 11 ёшида, ўқув видеосини томоша қилганидан сўнг илк бор рубик кубигини йиғган. Бир неча ҳафта ўтиб, биринчи расмий мусобақада қатнашган.
Ҳозирда Черри Флорида штати университетида таҳсил олади ва дунёнинг етакчи спидкуберларидан бири ҳисобланади. 2023 йилда у кўзи боғланган ҳолда рубик кубигини йиғиш бўйича World Cubе Association (WCА) жаҳон чемпиони бўлган. Шунингдек, Черри АҚШ ва Шимолий Америка чемпиони, 2025 йилги жаҳон чемпионатининг кумуш медали совриндори ҳисобланади.
