Президентнинг Ўзбекистонда молиявий технологиялар соҳасини ривожлантиришга қаратилган қарори қабул қилинди. Бу ҳақда Адлия вазирлиги хабар қилди.
Қайд этилишича, 2026–2030-йилларда соҳани ривожлантиришнинг асосий мақсадли кўрсаткичлари этиб молиявий технологиялар бўйича стартапларга 1 миллиард доллар хорижий инвестициялар жалб қилиш, шунингдек, соҳа бозори иштирокчилари сонини 200 тага етказиш белгиланган.
Марказий банк ҳузурида МЧЖ шаклида устав жамғармаси 50 миллион доллар эквивалентига тенг бўлган стартап лойиҳаларни молиялаштирадиган венчур фонд ва соҳавий стартаплар учун инновацион ҳаб ташкил қилинади.
2026 йил 1 январдан ҳаб иштирокчиларига молиявий технологиялар бўйича курсларда ўқиш ва сертификат олиш харажатларининг 50 фоизигача қисми, 20 минг доллардан ошмаган миқдорда қоплаб берилади.
Бундан ташқари, келаси йилдан Марказий банк томонидан молиявий технологиялар соҳасида халқаро форумлар ташкил этилади.
