Истанбул прокуратураси Исроил бош вазири Биньямин Нетаньяху ва бошқа 36 нафар исроиллик амалдорни геноцид ва инсониятга қарши жиноятларда айблаб, қамоққа олиш ордерини берди. Бу ҳақда идора матбуот хизмати хабар берди.
Прокуратура баёнотида айтилишича, Исроил армиясининг фуқаролик обектлари, шифохоналар ва гуманитар миссияларга ҳужумлари, шунингдек, Ғазо секторининг қамалини ўрганиш доирасида халқаро конвенцияларнинг оммавий равишда бузилганлигини тасдиқловчи далиллар тўпланган.
Тергов якунларига кўра, Истанбул суди Исроилнинг 37 нафар амалдори, жумладан, бош вазир Биньямин Нетаньяху, мудофаа вазири Йисраэл Кац, миллий хавфсизлик вазири Итамар Бен-Гвир, Бош штаб бошлиғи Ҳерзи Ҳалеви ва ҳарбий-денгиз кучлари қўмондони Давид Саъар Саламарни қамоққа олиш ордерини чиқарган.
Прокуратура уларнинг ҳаракатларини “геноцид”, “ҳарбий жиноятлар” ва “инсониятга қарши жиноятлар” деб баҳолаган.
Ҳужжатда қайд этилишича, тергов Исроил кучларининг Ғазога гуманитар ёрдам олиб бораётган “Сумуд” халқаро флотилиясига ҳужумидан сўнг бошланган.
Тўпланган материаллар орасида жабрланган шахсларнинг кўрсатмалари, тиббий хулосалар, шунингдек, шифохоналар ва инфратузилмага қилинган ҳужумлар далиллари мавжуд.
Тергов маълумотларига кўра, Исроил ҳарбий ва сиёсий раҳбарлари юзлаб тинч аҳолининг, жумладан, аёллар ва болаларнинг ҳалок бўлиши, гуманитар объектларнинг вайрон этилиши ва Ғазо аҳолисига ёрдам кўрсатишга тўсқинлик қилганлиги учун жавобгар ҳисобланади.
Халқаро тергов 2023-йилнинг октябрь ойидан бошлаб қайд этилган қонунбузарликларни, жумладан, Ал-Аҳли шифохонаси, Туркия-Фаластин дўстлик шифохонасига ҳужумлар, секторни қамал қилиш ва гуманитар миссияларга ҳужумларни қамраб олади
