ДНК тузилишини кашф этгани учун Нобель мукофотига сазовор бўлган америкалик биолог Жеймс Уотсон 97 ёшида вафот этди. Бу ҳақда The New York Times хабар бермоқда.
Олимнинг ўғли Дунканнинг айтишича, отаси Нью Йорк штатидаги Лонг-Айлендда жойлашган хосписда ҳаётдан кўз юмган.
1953-йилда Кембриж олимлари Уотсон ва Френсис Крик ДНК тузилишини “қўш спирал” шаклида тасвирловчи мақолани эълон қилишди. Уларнинг иши Лондон Қироллик коллежида Розалинда Франклин ва Морис Уилкинс томонидан тўпланган тажриба маълумотларига асосланган эди.
1962-йилда Уотсон, Крик ва Уилкинс ДНК молекуласининг тузилишини кашф этганликлари учун Нобель мукофотига сазовор бўлишган. Ўша пайтда Уотсон 34 ёшда эди.
2014-йилда Уотсоннинг Нобель медали Christie’s кимошди савдосида 4,757 миллион долларга сотилди. Олим бунинг учун 4,1 миллион доллар олди ва маблағларни илмий-тадқиқот ҳамда хайрия ташкилотларига ўтказишни ваъда қилган. Кейинчалик маълум бўлишича, медални миллиардер Алишер Усмонов сотиб олган ва 2015-йилда уни биологга қайтариб берган.
Кембриждан сўнг Уотсон Гарвардда ишлаган, 1968-йилда эса Лонг-Айленддаги Cold Spring Harbor лабораториясига раҳбарлик қила бошлаган. У бу лабораторияни молекуляр биология ва саратон генетикаси бўйича етакчи марказга айлантирган. Унинг раҳбарлиги остида лаборатория саратон касаллиги бўйича йирик тадқиқотларни бошлаган. 1990-йилда олим инсон ДНКси кетма-кетлигини аниқлаш бўйича “Инсон геноми” лойиҳасини ишга туширишда иштирок этган.
2007-йилда Тhе Sunday Times газетасига берган интервюсидаги ирқчилик баёнотлари сабабли Уотсон 35 йил давомида раҳбарлик қилган Cold Spring Harbor лабораториясидаги бошқарув лавозимларидан четлаштирилганди ва кўплаб фахрий унвонлардан маҳрум этилганди.
