Қирғизистон президенти Садир Жапаров электр таъминотидаги узилишлар юзасидан шикоятларга муносабат билдирди. У мамлакат икки йил ичида энергия инқирозидан чиқишига ваъда бермоқда. Бу ҳақда 24.кг хабар берди.
Жапаровнинг сўзларига кўра, агар расмийлар сўнгги 5 йил ичида катта ишлар қилмаганида, қирғизистонликлар ҳозир умуман чироқсиз ўтириши мумкин эди.
“Тўқтағулдан бошлаб, 50—60—70 йилларда қурилган барча ГЭСлар бир марта ҳам таъмирланмаган, улар 50 йил давомида узлуксиз ишлаган. Мен ҳокимиятга келганимда, улар фожиали ҳолатда эди. Тўрт йил ичида ҳаммасини таъмирладик, Тўқтағул ГЭСда тўртта агрегат янгиланганидан сўнг қувват 240 мегаваттга ошди. Биз 28 та янги ГЭС қурдик, улар жами 400 мегаваттдан ортиқ қувват бермоқда. Агар бу ГЭСлар бўлмаганида, ҳозир чекловлар эмас, чироқни бутунлай ўчиришга мажбур бўлардик”, деди Садир Жапаров.
Унинг айтишича, илгари Қирғизистонда электр энергияси етарли эди, чунки завод ва фабрикалар йўқ эди.
“Агар мен завод ва фабрикалар, мактаб ва боғчалар қурмаганимда, ҳозир ҳам электр энергияси етарли бўларди”, деди у.
Президент таъкидлашича, илгари Қирғизистоннинг эҳтиёжи 14 миллиард киловатт-соатни ташкил этган бўлса, ҳозир бу кўрсаткич 20 миллиардга етган.
“Энергетика инқирозидан 2028 йилда чиқамиз. Юзга яқин ГЭС қуряпмиз. 15 декабрда Қирғизистондаги биринчи 120 мегаваттли қуёш электр станцияси ишга туширилади. Қора-Кечеда 1200 мегаваттли иссиқлик электр станциясини қуряпмиз. Қурилиш тугагач, 2028—2029 йилларда ҳеч қандай чекловларсиз электр энергиясини таъминлаймиз, уни импорт қилмаймиз”, дея ваъда берди президент.
У давлат электр энергиясини Қозоғистон, Ўзбекистон, Россия ва Туркманистондан 3,5 сомга сотиб олиб, истеъмолчиларга 1,37 сомдан сотишини айтди.
“Фарқни давлат қоплайди. Бу фарқ 30 йил давомида йиғилиб келган, 2020 йилга келиб, Миллий электр тармоғида 137 миллиард сомлик қарз пайдо бўлган. Қарзни ёпдик, 25 миллиард сом қолди. Келаси йилга келиб, қарзи қолмайди ва у даромад ола бошлайди. 35 йил сабр қилдингиз, яна икки йил сабр қилинг. Қўл қовуштириб ўтирмаймиз, ишлаяпмиз, ‘Қамбар-Ата-1’ қурилиши бошланяпти, 7—8 йил ичида тугайди. 1,5 миллиард доллар олдик, яна 1,5—2 миллиард доллар керак, лекин бу маблағни топамиз. Лойиҳа ўзини оқлайди”, дея ишонтирди Садир Жапаров.
