Жорий йилнинг 19 июль куни Тошкент шаҳрида номаълум шахс автомобили билан бошқа ҳайдовчининг йўлини тўсиб, унга қўлидаги тўппонча билан таҳдид қилди. Бу ҳақда жабрланувчи ижтимоий тармоқларда эълон қилган видеомурожаатида маълум қилди.
Унинг сўзларига кўра, ҳодисадан сўнг у дарҳол 102 қисқа рақами орқали ички ишлар органларига мурожаат қилган. Шундан сўнг у берган аризаси юзасидан Тошкент шаҳар Учтепа тумани Ички ишлар бўлимига чақиртирилган ҳамда фуқародан ариза ва тушунтириш хати олинган. Унинг айтишича, видеомурожаат эълон қилинган пайтга қадар ҳолат юзасидан ҳеч қандай натижа бўлмаган.
Жабрланувчи қурол билан юрган шахс бошқа фуқароларга ҳам зарар етказиши мумкинлигини билдириб, ҳуқуқни муҳофаза қилувчи органлардан унга нисбатан қонуний чора кўрилишини сўраган. Шунингдек, у ушбу шахс аниқланиб, жавобгарликка тортилмагунча ҳолатни жамоатчилик эътиборида сақлаш мақсадида видеони тарқатишга чақирган.
Ички ишлар вазирининг матбуот котиби Шоҳруҳ Ғиёсовнинг сўзларига кўра, олиб борилган тезкор-қидирув тадбирлари натижасида қоидабузар аниқланиб, ушланган. Шундан сўнг ҳолат юзасидан Тошкент шаҳар Учтепа тумани судида Маъмурий жавобгарлик тўғрисидаги кодекснинг 183-моддаси (майда безорилик) бўйича иш кўриб чиқилган.
Маълум қилинишича, Жиноят ишлари бўйича Учтепа тумани суди қарори билан қоидабузарга нисбатан 10 сутка маъмурий қамоқ жазоси тайинланган.
