Францияда 15 ёшгача бўлган болалар 1 сентябрдан бошлаб ижтимоий тармоқлардан фойдаланиши тақиқланади. Бу ҳақда мамлакат президенти Эммануэл Макрон ўзининг ижтимоий тармоқлардаги саҳифаларида маълум қилди.
Тегишли қонун лойиҳаси парламент томонидан маъқуллаб бўлинган. France 24 маълумот беришича, 81 нафар депутат қонун қабул қилинишига қарши овоз берган, ёқлаганлар — 279 нафар.
Макроннинг таъкидлашича, бундай ташаббуслар Францияни интернетда болалар ва ўсмирларни ҳимоя қилиш бўйича Европада етакчига айлантиради.
1 сентябрдан кучга кирадиган қонуннинг биринчи босқичи 15 ёшдан кичик болалар учун ижтимоий тармоқларда аккаунтлар яратишни тақиқлашни назарда тутади. 2027 йилнинг январидан эса ушбу чеклов мавжуд ҳисоб қайдномаларига ҳам татбиқ этилади. Бунда платформалар фойдаланувчиларнинг ёшини текшириши шарт бўлади.
