Тожикистонда ижтимоий тармоқлардаги лайк ва изоҳлар учун жазолаш амалиёти тўхтатилди. Бу ҳақда бош прокурор Ҳабибулло Воҳидзода матбуот анжуманида маълум қилди.
Прокурор мамлакатда террорчилик ва экстремизм билан боғлиқ жиноятлар сони камайганини айтди. 2025 йил якунларига кўра, бундай ҳуқуқбузарликлар 2024-йилга нисбатан 23 фоиздан кўпроққа, яъни 314 тага қисқарган.
Бош прокурор бу натижага Тожикистон президенти Эмомали Раҳмоннинг ижтимоий тармоқларда лайк босиш ва изоҳ қолдириш учун жиноий иш қўзғатмаслик ҳақидаги кўрсатмасидан сўнг эришилганини таъкидлади. Шунингдек, аҳолига тушунтириш ишлари кучайтирилгани билдирилди.
Воҳидзода экстремистик ва террорчилик учун санкциялар қўлланилган 405 нафар шахс жавобгарликка тортилмаганини айтди.
Маълумот ўрнида, лайк ва репостлар учун жавобгарликни бекор қилиш тўғрисидаги қонун Тожикистон парламенти томонидан қабул қилиниб, 2025 йил май ойида Эмомали Раҳмон томонидан имзоланган. Ўшанда президент айрим давлат органлари фуқароларга нисбатан асоссиз жиноий иш қўзғаётганини билдириб, бу амалиётга чек қўйиш зарурлигини таъкидлаган.
Аввалроқ Тожикистон Олий суди раиси Рустам Мирзозода интернетда лайк босган ва изоҳ қолдирган шахслар иши қайта кўриб чиқилиши мумкинлигини маълум қилган эди.
