Бугун, 8 июнь куни Хитой Халқ Раиси Си Цзиньпин Корея Халқ Демократик Республикасининг пойтахти Пхеньянга давлат ташрифи билан борди ва икки кунлик расмий сафари бошланди. Бу ҳақда Хитой Марказий телевидениеси хабар берди.
Аввалроқ, Хитой Ташқи ишлар вазирлиги ташриф 8–9 июнь кунлари Корея Халқ Демократик Республикаси раҳбари Ким Чен Ин таклифига биноан амалга оширилишини билдирган эди.
Ташриф Пекин ва Пхеньян ўртасидаги фаоллашган алоқалар фонида ўтмоқда. Хитой Корея Халқ Демократик Республикасининг асосий иқтисодий ва сиёсий ҳамкори бўлиб қолмоқда, икки давлат муносабатлари одатда Корея ярим оролидаги барқарорликнинг муҳим омилларидан бири сифатида қаралади.
Си Цзиньпин билан бирга унинг рафиқаси Пэн Лиюань, Хитой Коммунистик партияси Марказий қўмитаси Сиёсий бюроси Доимий қўмитаси аъзоси Цай Ци, Хитой Ташқи ишлар вазири Ван И ва бошқа юқори мартабали расмийлар ҳам ҳамроҳлик қилмоқда.
Ҳозирча музокараларнинг аниқ мазмуни ошкор этилмаган. Хитой ҳукумати аввалроқ икки томонлама муносабатлар ва стратегик ҳамкорликни ривожлантириш муҳимлигини таъкидлаган эди.
Ташриф давомида томонлар ҳамкорлик, минтақавий хавфсизлик ва халқаро кун тартиби масалаларини муҳокама қилиши кутилмоқда.
Си Цзиньпиннинг КХДРга ушбу ташрифи сўнгги етти йилдаги биринчи давлат ташрифи бўлиб, икки давлат муносабатларидаги энг муҳим дипломатик воқеалардан бири бўлиши мумкин.
Аввалги давлат ташрифи 2019 йилда бўлиб ўтган эди. Шундан кейин икки давлат раҳбарлари алоқаларни давом эттирган, аммо юқори даражадаги расмий ташрифлар амалга ошмаган.
