Аввалроқ, АҚШнинг Огайо штатида ўзбекистонлик юк машина ҳайдовчиси Беҳзод Асроров автоҳалокат оқибатида коллеж футболчиси бўлган Тобиас Форсайтнинг ўлимига сабаб бўлгани ҳақида хабар берилган эди. Асроров жорий йилнинг 10 июль куни илк бор судда қатнашди ва шартли равишда озод қилинди. Бу ҳақда “ABC 6” нашри хабар берди.
Қайд этилишича, Асроров Мадисон округи суд мажлисида таржимон орқали мулоқот қилган. Ҳайдовчи электрон кузатув мосламаси тақиш шарти билан гаровсиз озод қилинган.
Маълумотларга кўра, автоҳалокатдан кейинги тергов давомида юк машинасининг бошқарув камерасига оид ҳолатлар текширилмоқда. Тергов якунлангач, унга қўшимча айбловлар қўйилиши мумкин.
Мазкур ҳодиса АҚШда тижорат ҳайдовчилик гувоҳномасини (CDL) олиш талаблари, хусусан, юк машинаси ҳайдовчиларининг тайёргарлиги ва инглиз тилини билиш даражаси бўйича баҳсларни кучайтирди.
Маълумот учун, Асроров Огайо штатида CDL гувоҳномасини 2024 йил кузида олган. АҚШ Ички хавфсизлик департаменти унинг мамлакатга шу йилда грин-карта дастури орқали кирганини билдирган.
Ҳозирда мазкур иш бўйича тергов давом этмоқда. Ҳалок бўлган спортчининг оиласи унинг дафн маросимига тайёргарлик кўрмоқда.
