АҚШ бошчилигидаги халқаро коалиция 30 сентябрга қадар Ироқдан ўз қўшинларини тўлиқ олиб чиқиб кетади. Бу ҳақда Ироқ бош вазири Али ал-Зайдийга таяниб Al Jazeera хабар берди.
Зайдий белгиланган муддат “қатъий ва якуний” эканини айтди. Унинг ушбу баёноти АҚШ Марказий қўмондонлиги раҳбари генерал Бред Купер билан ўтказилган учрашувдан сўнг янгради. АҚШ бошчилигидаги кучлар Ироққа 2003 йилда бостириб кирганди. Улар ёрдамида мамлакатнинг собиқ етакчиси Саддам Ҳусайн ҳукумати ағдарилган. 2011 йил декабрида сўнгги жанговар қўшинлар мамлакатдан олиб чиқиб кетилган.
Аммо 2014 йилда ИШИД кучайиши ҳамда Ироқ ва Суриядаги катта ҳудудларни эгаллаб олиши Ироқ ҳукуматининг таклифига биноан АҚШ кучларининг қайтишига сабаб бўлган. ИШИД ўзи даъво қилган ҳудудлар устидан назоратни йўқотгач, 2021 йилда коалициянинг ҳарбий операциялари якунланганди.
1 октябрь Ироқ давлатчилиги йўлида янги кун бўлади, чунки Ироқ ҳар қандай хорижий ҳарбий иштирокдан холи бўлади, дейилади Ироқ бош вазири идораси баёнотида.
Ушбу муддат ал-Зайдийнинг июль ойи ўрталарида Вашингтонга қилган ташрифи чоғида белгиланган. Учрашувда томонлар суверенитетни ўзаро ҳурмат қилиши, иқтисодий ва хавфсизлик соҳасида ҳамкорликка ўтишини таъкидлаган.
АҚШ расмийси 30 сентябргача қўшинларни олиб кетиш кутилаётганини айтди. Бироқ у Ироқда қанча қўшин қолиши ва улар қаерга жойлаштирилиши ҳақида маълумот беришдан бош тортди.
АҚШ қўшинлари 2024 йил Ироқнинг аксарият ҳудудларидаги базаларни тарк этган, бироқ ярим мухтор шимолий Курдистон минтақасида ўз иштирокини сақлаб қолган. АҚШ ва Исроил 28 февраль куни Эронга қарши уруш бошлаганидан бери у ердаги ҳарбий базалар мунтазам равишда ҳужумга учраб келмоқда.
Ҳозирда АҚШ Ироқда 2500 нафарга яқин аскарга эга. АҚШ ҳарбий қисмлари асосан учта ҳарбий базада мустаҳкам ўрнашган: уларнинг бири Бағдодда, иккинчиси ғарбий Анбар вилоятида ва яна бири шимолий Курдистон минтақасида жойлашган.
