2025 йилнинг июнь ойида Исроил ва АҚШ Эроннинг ядровий объектларига ҳужум қилгач, мамлакат уранни бойитмай қўйди. Бу ҳақда Эрон Ташқи ишлар вазири Аббос Ароқчига таяниб, “Iran International” нашри хабар берди.
Қайд этилишича, вазир мамлакат уранни бойитиш ёки ядровий технологияларга бўлган ҳуқуқидан воз кечмаслигини таъкидлаган.
More stories“Эрон ҳудудида ҳеч қандай яширин уран бойитиш жараёни йўқ. Барча объектларимиз Халқаро атом энергияси агентлиги (IAEA) томонидан назорат қилинади. Ҳозир бойитиш бўлмаяпти, чунки бойитиш иншоотларимизга ҳужум қилинган”, дейди у.
АҚШ ва бошқа давлатлар билан музокараларни қай тарзда тиклаш мумкинлиги ҳақида саволга Ароқчи қуйидагича жавоб берган:
“Эроннинг уранни бойитиш ва тинч мақсаддаги ядровий технологиядан фойдаланиш ҳуқуқи рад этилмайди. Биз бу ҳуқуқдан ҳеч қачон воз кечмаймиз”, дея таъкидлади вазир.
Унинг бу баёнотлари МАГАТЭ бошқарув кенгашининг ушбу ҳафтадаги йиғилишидан олдин янгради. Унда Эрон билан ҳамкорлик йўқлиги бўйича янги резолюция овозга қўйилиши мумкин. Европа давлатлари сентябрь ойида Эронга қарши БМТ санкцияларини қайта жорий этиш чораларини кўрганди.
Президент Дональд Трамп 2018 йилда АҚШни 2015 йилги ядровий келишувдан чиқариб юборганидан сўнг, Эрон уранни 60 фоизгача бойитиб келаётган эди. Теҳрон ўз дастурининг тинч мақсадларда эканини таъкидлаб келади.
2025 йил бошида АҚШ Эронга 60 кунлик ультиматум билан музокараларни бошлаган эди. 61-куни, яъни 13 июнда Исроил кутилмаган ҳарбий операция бошлади ва 22 июнда АҚШ Исфаҳон, Натанс ва Фордодаги ядровий объектларга зарбалар берди.
“АҚШ ҳукуматининг ҳозирги сиёсати тенг ва адолатли музокараларга тайёрлигини кўрсатмаяпти. Биз ҳозиргача америкаликлардан кўрган нарса аслида ўз талабларини мажбуран ўтказишга уриниш бўлди, мутлақо максимал ва ҳаддан ташқари талаблар. Бундай талаблар олдида биз мулоқот учун имконият кўрмаяпмиз”, дея қўшимча қилди Ароқчи.
