Фаластиннинг ҲАМАС ҳаракати ўз стратегиясини ўзгартириб, сиёсий партияга айланмоқчи. Бу ҳақда манбаларга таяниб, Asharq al-Awsat хабар берди.
Маълумотларга кўра, ҲАМАС етакчиларининг бир гуруҳи сиёсий, иқтисодий ва ижтимоий ҳаётда фаол иштирок эта оладиган, Фаластин партияларига ўхшаш миллий исломий йўналишни ифодаловчи сиёсий тузилма яратишни таклиф қилган. Ушбу ташаббус доирасида ҲАМАС Фаластин озодлик ташкилоти (ФОТ) таркибига қўшилиши ва уни ислоҳ қилиши кўзланган.
Тегишли таклифлардан иборат ҳужжат аллақачон ҲАМАС сиёсий бюросига топширилган. Муҳокама урушдан кейинги вазият таҳлили ва Исроил операцияси ҳамда ўт очишни тўхтатиш келишуви туфайли юзага келган ўзгаришлар фонида олиб борилмоқда.
ҲАМАСнинг хориждаги етакчиларидан бири бу ташаббус қуролсизланиш масаласига тўғридан-тўғри жавоб эмаслигини, балки минтақадаги “сиёсий ўтиш даври”га мослашиш заруратидан келиб чиққанини айтган. Унинг таъкидлашича, Исроил ҲАМАСни ҳарбий йўл билан йўқ қила олмади ва ҳаракат ўзининг сиёсий таъсирини сақлаб қолишга интилмоқда.
Манбаларга кўра, қуролли қанотни сақлаб қолиш масаласи ҳам кўриб чиқилмоқда. ҲАМАС бу борада Миср, Қатар, Туркия ва билвосита АҚШ билан маслаҳатлашувлар ўтказмоқда. Ҳаракат баёнотига кўра, қаршилик билан боғлиқ ҳар қандай қарор фақат умумфаластин келишуви доирасида ва Исроил ёки халқаро қуролсизлантириш миссияларисиз қабул қилиниши керак.
Манбалар таъкидлашича, ҲАМАС қуролсизланиш, Ғазо устидан назоратдан воз кечиш ва 1967 йилги чегаралар доирасида Фаластин давлатини тузишни назарда тутувчи узоқ муддатли сиёсий келишувга ўтиш бўйича босимга дуч келмоқда.
