Ливан ва Исроил ўртасида 16 апрель куни ўрнатилган ўт очишни тўхтатиш тартиби 45 кунга узайтирилади. Бу ҳақда АҚШ Давлат департаменти матбуот котиби Томми Пиготт X ижтимоий тармоғидаги саҳифасида ёзиб қолдирган.
“АҚШ 14–15 май кунлари Исроил ва Ливан ўртасида икки кунлик жуда самарали музокараларга мезбонлик қилди. Келгуси тараққиётни таъминлаш мақсадида 16 апрелда жорий этилган жанговар ҳаракатларни тўхтатиш тартиби 45 кунга узайтирилади. Давлат департаменти 2 ва 3 июнь кунлари музокараларнинг сиёсий йўналишини қайта тиклайди. Бундан ташқари, 29 май куни Пентагонда ҳар икки давлат ҳарбий делегациялари иштирокида хавфсизлик масалалари бўйича мулоқот йўлга қўйилади”, деб ёзган у.
Пиготт ушбу муҳокамалар икки мамлакат ўртасида мустаҳкам тинчлик ўрнатишга, ҳар икки давлатнинг суверенитети ва ҳудудий яхлитлигини тўлиқ тан олишга, шунингдек, уларнинг умумий чегараси бўйлаб ҳақиқий хавфсизликни таъминлашга ёрдам беришига умид билдирган.
28 февраль куни АҚШ ва Исроил Эронга қарши ҳарбий амалиёт бошлаб, бир қатор шаҳарларга зарбалар берганди. Амалиёт Яқин Шарқда кескинликнинг кучайишига, Форс кўрфазидаги барча мамлакатларнинг можарога тортилишига ҳамда Ҳормуз бўғозининг тўсиб қўйилишига олиб келди.
Ливаннинг “Ҳизбуллоҳ” гуруҳи Исроилни ракета ва дронлар билан ўққа тутиб, Эрон тарафида урушга қўшилгач, ЦАХАЛ Ливан жанубига ҳамда радикалларнинг инфратузилмаси жойлашган Байрутнинг жанубий чеккаларига зарбалар йўллади. Шунингдек, Исроил Ливан жанубидаги қуруқликдаги амалиётини ҳам кенгайтирди.
14 апрель куни Вашингтонда АҚШ ҳомийлигида Ливан-Исроил мулоқотларининг дастлабки босқичи бўлиб ўтди. Унда сулҳ битимига эришиш мақсадидаги тинчлик музокараларининг бошланиш санаси белгиланиши керак эди. Делегацияларга Ливан ва Исроилнинг Қўшма Штатлардаги элчилари Нада Ҳаммаде-Муаввад ва Ехиэл Лайтер бошчилик қилди.
16 апрель куни АҚШ президенти Дональд Трамп Исроил ва Ливан Шарқий вақт билан соат 17:00 дан бошлаб 10 кунлик сулҳ жорий этишга келишиб олганини маълум қилди. 24 апрелда эса у сулҳ яна уч ҳафтага узайтирилишини эълон қилди.
