Ижтимоий тармоқларда Фарғона вилоятининг Фарғона шаҳрида футбол мухлислари ҳуқуқни муҳофаза қилиш органлари ходимлари томонидан калтаклангани акс этган видео тарқалди. Ҳолат юзасидан вилоят Ички ишлар бошқармаси муносабат билдирди.
Унда айтилишича, кеча, 22 ноябрь куни Фарғона шаҳридаги “Истиқлол” стадионида бўлиб ўтган “Нефтчи” ва “Қизилқум” жамоалари ўртасидаги футбол ўйини бошланишидан олдин стадионнинг 2-сон назорат ўтиш жойида фуқаролар тартиб билан ҳудудига киритилаётган вақтда бир нечта чиптасиз шахслар стадионга ноқонуний киришга уриниб, темир тўсиқларни олиб ташлаб, ходимларнинг қонуний талабларига бўйсунмасликка ҳаракат қилган.
“Жамоат тартибини сақлашга жалб этилган ходимларнинг тезкор ва қатъий чоралари натижасида тартиббузарларнинг ҳаракатига чек қўйилган. Ҳозирда мазкур тартибсизликни уюштиришда гумонланган барча фуқароларнинг шахси аниқланган бўлиб, уларнинг ҳаракатларига қонуний баҳо бериш мақсадида суруштирув ҳаракатлари олиб борилмоқда”, дейилади ИИБ муносабатида.
Видеода ҳуқуқни муҳофаза қилиш органларининг ниқобли ходимлари таёқ (дубинка) билан фуқароларни урганини кўриш мумкин. Бунга жавобан улар орган ходимларига қарата қўлларидаги нарсаларни улоқтирган.
Футбол ўйинида Фарғонанинг “Нефтчи” жамоаси 2025 йилги Ўзбекистон Суперлигаси мавсумида чемпионликни муддатидан аввал қўлга киритди. Виталий Левченко бошчилигидаги жамоа мусобақа якунига бир тур қолганда “Қизилқум” устидан қозонилган ғалаба эвазига 24 йиллик танаффусдан сўнг мамлакат чемпионига айланди.
