2026 йил июнда Ўзбекистонда электромобиллар савдосида кескин ўсиш кузатилди. Бу ҳақда Иқтисодий тадқиқотлар ва ислоҳотлар маркази маълумот берди.
Таҳлил қилинишича, ўтган ойда бирламчи ва иккиламчи бозорларда 8,4 мингта электромобиль олди-сотди қилинган. Мазкур рақам май ойидагига нисбатан қарийб 63,5 фоизга ўсган.
“2026-йилнинг биринчи ярмида 40 мингдан ортиқ электромобиль сотилган. Ушбу кўрсаткич 2025-йилнинг мос даврига нисбатан 40 фоизга кўп”, дея қайд этган марказ.
Ўрганишларга кўра, республиканинг аксар ҳудудларида электрда ҳаракатланувчи автомобиллар бозори фаоллашган. Савдодаги пасайиш эса фақатгина Сирдарё вилоятида (2,9 фоиз) кузатилган.
Сотувларда энг юқори ўсиш суръатлари Жиззах (101 фоиз), Бухоро (64,6 фоиз) ва Фарғона (58,5 фоиз) вилоятларида қайд этилган.
“Электромобиллар савдосининг асосий қисми Тошкент шаҳри ҳиссасига тўғри келмоқда. Июнь ойида пойтахт улуши бозор умумий ҳажмининг қарийб 63 фоизини ташкил этди. Савдолар май ойига нисбатан 78 фоизга ошиб, 5,3 мингтага етди”, дейилади таҳлилда.
Божхона қўмитаси маълумотига кўра, Ўзбекистон 2026 йил июнь ойида 7 845 дона электромобиль импорт қилган. Бу 2025 йил июнига нисбатан 3286 тага кўп. Январь-июнь ойларидаги умумий электромобиллар импорти ҳажми эса 37 874 донани ташкил этган. Мазкур рақам ўтган йил мос даврига қараганда 23 523 донага ортган.
