Аввалроқ, россиялик спортчи, оғир вазн тоифасидаги собиқ жаҳон чемпиони Николай Валуев Россия 30 йилдан буён собиқ совет республикаларига нисбатан “юмшоқ сиёсат” қўллагани, энди уларга қаттиқ чоралар кўриш зарурлигини айтиб чиққани акс этган видеолар тарқалганди. Спортчи ушбу видео сунъий интеллект томонидан тайёрланганини маълум қилди.
Валуевнинг сўзларига кўра, бу видео бошидан охиригача қайта ишланган ва интернетда нафрат қўзғатиш учун тарқатилган.
“Бу воқеа сунъий интеллект билан боғлиқ. Аниқлиги шуки, баъзи одамлар уни ишлатиб, айтилган сўзларни бузиш ёки ундан ҳам ёмони, ҳаммасини бошидан охиригача яратмоқчи бўлишган. Мақсад нима? Жуда оддий. Бугунги кунда интернет нафақат фойдали маълумот манбаи, балки хавф манбаи эканлиги ҳаммага маълум. Видеоролик шаклида тақдим этилган маълумот ҳамиша кўрувчи ва тингловчини ишонтиришга мўлжалланган. Шу ерда сунъий интеллект жуда қулай восита бўлиб хизмат қилади. Ҳозирги кунда технологиялар ёрдамида инсонлар иштирокисиз фильмлар суратга олиниши мумкин – бу иш, аллақачон амалга оширилган. Фақат фарқи шундаки, энди бундай технология кенг оммага очиқ”, деган спортчи.
Унинг қўшимча қилишича, бугун сунъий интеллектга асосланган технологиялар барча томонидан қўлланилмоқда ва бу интернетда ёлғон маълумотларнинг кўпайишига олиб келмоқда.
“Бугунги кунда бундай технологиялар бутун давлатлар томонидан қўлланилмоқда ва доимий равишда такомиллашмоқда. Шунинг учун осон ишонмаслик керак. Интернетга тарқалган маълумотни бир неча марта ўйлаб, англаб олиш ва кейин тарқатиш яхшироқ. Айниқса, ишончсиз манбаларга ҳеч қачон ишонманг”, деган Валуев.
