Россия пойтахти Москвада қор қалинлиги рекорд даражадаги 80 сантиметрга етди. Бу пойтахтда охирги 72 йил ичида кузатилган энг юқори кўрсаткичдир. Бу ҳақда РИА Новости нашри Москва давлат университетига таяниб хабар берди.
Университет Метеорология ва иқлимшунислик кафедраси маълумотларига кўра, шаҳарнинг турли нуқталарида қор қалинлиги турлича, бироқ барчаси рекорд даражада. Хусусан, Москва давлат университети ҳудудида 80 сантиметр (мутлоқ рекорд), “Балчуг” станциясида эса 77 сантиметр.
Бундан олдинги энг юқори кўрсаткич 2013 йилнинг 26 мартида қайд этилган бўлиб, ўшанда қор қалинлиги 77 сантиметрни ташкил этган эди.
Коммунал хизматлар кучайтирилган тартибда ишламоқда
Шаҳарга 19 февраль куни ёпирилиб келган мисли кўрилмаган қор бўрони оқибатларини бартараф этиш учун шаҳар коммунал хизматлари бутун тунни кўчада ўтказди. Тозалаш ишларига барча махсус техникалар, фавқулодда вазиятлар ходимлари ва йирик муҳандислик компаниялари жалб қилинган.
Ҳозирда метрополитен бекатлари, автобус бекатлари ва пиёдалар йўлаклари қордан тозаланиб, кўчаларга музлашга қарши воситалар сепилмоқда. Москва халқа автомобиль йўли ва Янги Москва ҳудудида оғир юк машиналарига ёрдам бериш учун махсус шатакчи тракторлар ва кранлар навбатчилик қилмоқда. Темир йўлларни тозалашда эса ҳам рельсда, ҳам йўлда юра оладиган гибрид техникалардан фойдаланилмоқда.
Парвозлар бекор қилинди
Қалин қор ва ноқулай об-ҳаво пойтахт авиациясига ҳам жиддий таъсир кўрсатди. Хусусан, Москва аэропортларида 16 та рейс бекор қилинди ва битта самолёт муқобил аэродромга йўналтирилди.
“Валли” циклони
Москвага кучли бўронни “Валли” циклони олиб келди. Ўтган сутка давомида пойтахтга ойлик ёғингарчилик нормасининг 64 фоизи ёғди. Бу охирги 56 йил ичидаги энг юқори кўрсаткичдир. Шамол тезлиги сониясига 17 метргача етди.
Fobos об-ҳаво маркази мутахассиси Евгений Тишковецнинг сўзларига кўра, февраль ойи учун белгиланган иқлимий норма деярли қайд этилиб бўлинган. Бироқ қорли об-ҳаво яна камида беш кун давом этиши, 23 февраль куни (Ватан ҳимоячилари куни)эса яна бир кучли қор бўрони бўлиши кутилмоқда.
