28 апрель куни Москва шимолидаги қурилаётган бинода чиққан ёнғин оқибатида саккиз киши ҳалок бўлди, яна 13 киши жароҳатланди. Бу ҳақда тезкор хизматларга таяниб, ТАСС хабар берди.
Қайд этилишича, ёнғин 2-Амбулатория йўли, 14-уй манзилидаги қурилаётган тураржой биносида содир бўлган. Бу элита тураржой мажмуасининг қурилиш майдони ҳисобланади. Бинонинг иккинчи ва учинчи қаватлари ёниб кетган.
Дастлаб ёнғинга бешинчи, энг юқори мураккаблик даражаси берилган, бироқ кейинчалик у тўртинчи даражага туширилган. Олов 1,4 минг квадрат метр майдонга тарқалган. Ҳозирда ёнғин ўчирилган. Жами 120 нафар ходим ва 30 та техника воситаси ёнғинни бартараф этишга жалб қилинган.
Россия Фавқулодда вазиятлар вазирлиги матбуот хизмати хабарига кўра, ёнаётган бино ичида 200 дан ортиқ киши бўлган бўлиши мумкин. Сўнгги маълумотларга кўра, қурилиш майдонидан 31 киши қутқарилган.
Қурилиш ишларини олиб боришда хавфсизлик қоидаларини бузиш (РФ Жиноят кодексининг 216-моддаси, 3-қисми) бўйича жиноят иши қўзғатилган. Ёнғинга нима сабаб бўлгани ҳозирча очиқланмаган.
