Колумбиянинг жануби-ғарбида жойлашган Каука департаментида кучли портлаш юз берди. Ҳодиса Панамерика шоссесида содир бўлган. Бу ҳақда ҳудуд губернатори Октавио Гусман X ижтимоий тармоғида ёзиб қолдирди.
Унга кўра, портлаш одамлар гавжум пайтда юз берган ва оқибатда 14 киши ҳалок бўлган. Яна камида 38 киши жароҳат олган, улар орасида 5 нафар вояга етмаганлар ҳам бор.
Портлаш оқибатида йўл инфратузилмасига, айниқса Панамерика шоссесига жиддий зарар етган. Губернатор ҳалок бўлганлар яқинларига ҳамдардлик билдириб, жабрланганларга ёрдам кўрсатилаётганини айтган.
Колумбия Президенти Густаво Петро ушбу ҳужумни кескин қоралаб, уни содир этганларни “террорчилар, фашистлар ва наркосавдогарлар” деб атаган. У халқаро даражада бу гуруҳга қарши курашни кучайтиришга чақириб, молиявий манбаларини аниқлаш ва йўқ қилиш зарурлигини таъкидлаган.
Расмийлар воқеа юзасидан тергов олиб бормоқда.
