Покистон суди 20 декабрь куни мамлакат собиқ бош вазири Имрон Хон ва унинг рафиқаси Бушра Бибини давлат совғаларини арзонлаштирилган нархларда сотиб олиш билан боғлиқ коррупция иши бўйича 17 йиллик қамоқ жазосига маҳкум этди. Бу ҳақда суд ва Хоннинг адвокатларига таяниб Reuters хабар берди.
Покистон Федерал қидирув агентлигининг махсус суди эълон қилган ҳукмга кўра, 10 йил — ишончни суиистеъмол қилганлик учун ва 7 йил — коррупцияга қарши кураш қонунлари асосида тайинланди. Бундан ташқари, суд эр-хотинга йирик миқдорда жарима ҳам солди. Имрон Хоннинг адвокати Рана Мудассар Умернинг сўзларига кўра, суд ҳукмни ҳимоя томонининг аргументларини тингламасдан эълон қилган.
Саудия соатларини ўзлаштириш
Мазкур жиноий иш Саудия Арабистони валиаҳд шаҳзодаси Муҳаммад бин Салмон томонидан расмий ташрифлар чоғида Имрон Хонга совға қилинган ҳашаматли соатларга боғлиқ. Прокуратура талқинига кўра, Хон ва унинг рафиқаси совғаларни сақлаш қоидаларини бузган ҳолда, ушбу буюмларни давлатдан жуда паст (арзонлаштирилган) нархларда сотиб олган. Ахборот вазири Аттаулла Тарарнинг таъкидлашича, ушбу ноқонуний харид оқибатида давлат бюджетига бир неча миллион рупий зарар етказилган.
Имрон Хон 2023-йилнинг августидан буён панжара ортида. У ҳозирда ер билан боғлиқ бошқа бир коррупция иши бўйича 14 йиллик қамоқ жазосини ўтамоқда. Янги тайинланган 17 йиллик жазо муддати аввалги муддат якунлангач бошланиши айтилмоқда.
Хоннинг вакили Зулфи Бухорий мазкур қарорни адолатнинг асосий тамойилларини эътиборсиз қолдириш ва суд жараёнини “танлаб жазолаш қуроли”га айлантириш деб атади. Собиқ бош вазир 2022-йилда лавозимидан четлатилганидан бери ўнлаб айбловлар, жумладан, коррупция, терроризмга қарши кураш ва давлат сирларини ошкор қилиш каби ишлар билан юзлашмоқда.
Хоннинг партияси ушбу ишларни сиёсий мотивга эга деб ҳисоблайди. Хоннинг яна бир адвокати Салмон Сафдарнинг маълум қилишича, собиқ бош вазир янги суд қарори устидан Исломобод Олий судига апелляция бериш бўйича кўрсатма берган.
