Сурхондарё вилоятида 1 килограммдан ортиқ гиёҳвандлик моддаларини ички аъзоларига яширган фуқаролар ушланди. Бу ҳақда Давлат хавфсизлик хизмати хабар берди.
Маълум қилинишича, Сурхондарёда ўтказилган тезкор тадбирда 1955 ва 2001 йилларда туғилган 2 нафар Афғонистон фуқароси Термиз халқаро савдо марказида 1 килограмм 76 грамм “опий” моддасини шартли харидорга 5 минг АҚШ долларига сотган вақтларида қўлга олинган.
Аниқланишича, улар гиёҳвандлик воситаларини яширин тарзда олиб келишда ўз ички аъзоларидан “жонли контейнер” сифатида фойдаланган.
Ҳозирда ҳолат бўйича қонунбузарларга нисбатан Жиноят кодексининг 246-моддаси (контрабанда) 2-қисми ва 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят ишлари қўзғатилиб, “қамоқ” эҳтиёт чораси қўлланилган. Тергов ҳаракатлари олиб борилмоқда.
Эслатиб ўтамиз, аввалроқ Афғонистондан Ўзбекистон ҳудудига олиб кирилган 25 килограммдан ортиқ гиёҳвандлик воситалари тўхтатиб қолинганди.
