Бугун, 2 март куни Тошкент шаҳрида катта миқдорда гиёҳванд моддалар тайёрлаган ва тарқатган шахс қўлга олинди. Бу ҳақда Давлат хавфсизлик хизмати хабар берди.
Қайд этилишича, 1979 йилда туғилган шахс пойтахтдаги кўп қаватли уйлар йўлаклари ва бошқа жойларга хориждан олиб келинган гиёҳванд моддаларни яшириб кетаётган вақтида тезкор тадбир давомида ушланган. Унинг ёнидан ва автомобилидан 15 дона “Альфа ПВП” ҳамда 24 дона “Мефедрон” моддаси топилган.
Шунингдек, гумонланувчининг яшаш хонадони кўздан кечирилганда, уй ертўласида ташкил этилган нарколаборатория аниқланган. Тезкор тадбирлар давомида жами 2,8 килограмм гиёҳванд моддалар, 11,5 литр прекурсорлар ҳамда наркотик тайёрлашда фойдаланиладиган анжомлар ашёвий далил сифатида олинган.
Бундан ташқари, унинг телефонидаги геолокация маълумотлари асосида Сирдарё вилояти Ховос туманидаги яширин жойдан яна 49,9 килограмм ва 48 литр прекурсорлар топилиб, мусодара қилинган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилган. Гумонланувчига нисбатан қамоқ эҳтиёт чораси қўлланилган. Тергов ҳаракатлари давом этмоқда.
