Аввалроқ, Туркиянинг Истанбул шаҳри Шишли туманида чиқинди йиғувчи томонидан ахлат контейнеридан ўзбекистонлик Дурдона Ҳакимованинг жасади топилгани ҳақида хабар берилган эди. Мазкур иш доирасида у ўлдирилган Умрониядаги уйда яна бир ўзбекистонлик аёл – Сайёра Эргашалиева ҳам бўлаклаб ўлдирилгани аниқланди. Бу ҳақда Ўзбекистоннинг Истанбул шаҳридаги бош консулхонаси хабар берди.
Туркия ҳуқуқни муҳофаза қилувчи органларидан олинган дастлабки маълумотларга кўра, аввал Дурдона Ҳакимованинг ўлими билан боғлиқ ҳодисадан сўнг бедарак йўқолган деб топилган фуқаро 1994 йилда Наманган вилоятида туғилган Эргашалиева Сайёранинг вафот этгани аниқланган.
Маълум қилинишича, тергов жараёнида марҳума Сайёра Эргашалиева Дурдона Ҳакимованинг яқин дугонаси бўлгани аниқланган. Шунингдек, тергов жараёнида гумонланувчилар Эргашалиева юзасидан кўрсатма беришдан бош тортганликлари қайд этилган.
Дастлабки маълумотларга кўра, жорий йилнинг 22 январ куни марҳумалар ҳамда гумонланувчилар Истанбул шаҳрининг Фотиҳ туманида жойлашган ресторанларнинг бирида биргаликда тушлик қилган. Учрашув давомида Эргашалиева ва Ғ.К. ўртасида келишмовчилик юзага келган. Тахминларга кўра, можаро Эргашалиеванинг Ўзбекистонга қайтиш нияти билан боғлиқ масалада келиб чиққан.
23 январь куни Т.Д. ва Ғ.К. ўзаро тил бириктирган ва Эргашалиевани аввал пичоқ билан ўлдириб, танани бир неча қисмларга бўлиб, Фотиҳ туманидаги ахлат қутиларига ташлашган. 24 январь куни қотиллар Эргашалиеванинг телефонидан Ҳакимовага SMS хабар юбориб уни ҳам чақириб, Эргашалиева сингари уни пичоқ тиқиб ўлдириб, танани бир нечта қисмларга бўлиб, Шишли туманидаги ахлат қутиларига ташлашган.
Қайд этилишича, Эргашалиеванинг жасади топилган, бироқ Истанбул Суд тиббий экспертизасига ҳозирча жасад олиб келинмаган.
Ўзбекистон Республикасининг Истанбул шаҳридаги Бош консулхонаси мазкур ҳолатни доимий назоратга олган бўлиб, Туркия ҳуқуқни муҳофаза қилувчи органлари билан яқин ҳамкорликда иш олиб бормоқда.
Тергов ҳаракатлари давом этмоқда. Гумонланувчиларга нисбатан қамоққа олиш бўйича эҳтиёт чора қўлланилган ва улар айбига иқрор бўлишган, ҳужжатлар судга тақдим қилинган.
Ваҳший қотиллик
Жорий йилнинг 24 январь куни кечаси Истанбулнинг Шишли тумани Дуатепе маҳалласида даҳшатли воқеа содир бўлди. Маҳаллий вақт билан соат тахминан 19:40 ларда ҳудудда чиқинди йиғиш ва қоғоз териш билан шуғулланиб юрадиган Окан исмли шахс Куюлубоғ кўчаси, 25-уй олдидаги ахлат контейнерини ковлар экан, чойшаб ва пакетларга ўралган жасадни пайқаб қолган. У ҳолат ҳақида хабар бериш учун полиция бўлимига бориб, кўрганларини айтиб берган.
Оканнинг айтишича, у ҳодиса вақтида контейнерни кавлаётганида қора пакетни кўрган, пакетни йиртганида қон ва инсон жасадига кўзи тушган ҳамда жасад ҳали иссиқ эканини сезган. Шундан сўнг Ферикўй полиция бўлимига бориб ҳолатни маълум қилган, полиция ходимлари ҳам воқеа жойига келиб, жасадни контейнер ичида кўрган. У полиция билан бирга яна ҳодиса жойига қайтган. Дастлабки кўздан кечиришда жасаднинг боши кесилган бўлиб, аёл кишига тегишли экани тахмин қилинган.
Қотиллик бўлими детективлари олиб борган текширувлар давомида яна бир гувоҳнинг кўрсатмаси олинган. Гувоҳнинг айтишича, соат 19:00 лар атрофида у онасини кўриш учун мазкур кўчага келган ва шу пайтда ахлат контейнери олдида соқолли икки эркакнинг чамадон билан кутиб турганини кўрган.
Шунингдек, гумонланувчиларнинг жасадни чамадон ичида олиб келиб ташлаган лаҳзалари акс этган кузатув камераси тасвирлари ҳам аниқланган. Кадрларида икки шахс қўлларида чамадон билан контейнер ёнига келаётгани кўринади.
Детективлар ҳодиса жойида олиб борган ишлар чоғида жасаднинг танаси солинган контейнерда бош ва оёқлар йўқлигини аниқлаган. Жасад солинган деб тахмин қилинган чамадон эса бир неча кўча наридаги Бозкурт кўчасидаги бошқа ахлат жойидан топилган.
Ҳодиса жойи бузилмаслиги учун жасад контейнердан чиқарилмаган, шу сабабли тананинг тўлиқ ҳолати жойида батафсил баҳоланмаган. Ҳудуд хавфсизлик ҳалқасига олиниб, Қотиллик бўлими ва Ҳодиса жойини кўздан кечириш бўлимига хабар берилган ва кенг қамровли тергов бошланган.
Жамоат хавфсизлиги бўлими ходимлари томонидан ўтказилган текширувлар натижасида бармоқ изи орқали аёлнинг шахси аниқланган. У Ўзбекистон фуқароси Дурдона Ҳакимова экани маълум бўлган. Жасад кўздан кечирилганда унинг устида қора рангли куртка, қора рангли узун енгли свитшот, қора ички кийим бўлгани ва оқ чойшабга ўралган ҳолатда экани аниқланган. Марҳуманинг шахси бармоқ изи орқали тасдиқланган.
Камера ёзувлари ва гувоҳларнинг кўрсатмаларига кўра, ҳодиса жойидаги ахлат контейнерига қорамтир кийимдаги, соқолли икки эркак оч рангли чамадон билан келгани, кейин яна чамадон билан пиёда кўчадан чиқиб кетгани, гумонланувчилар чамадонни ҳодиса жойига яқин бўлган Бозкурт кўчаси томон ташлаб кетгани аниқланган.
Истанбул полицияси Истанбул аэропортида Грузияга қочмоқчи бўлган пайтда икки нафар қотилликда гумонланувчини қўлга олган. Уларнинг иккаласи ҳам Ўзбекистон фуқаролари экани маълум бўлган. Разведка бўлими ва Қотиллик бўлими томонидан бир неча соат ичида ушланган гумонланувчилардан бири қотилликни бевосита содир этган, иккинчиси эса ёрдам бергани аниқланган.
Қотилликни содир этган Д.Т. кўрсатма берган.
“Дурдона Ҳакимова билан воқеа куни танишганмиз, орамизда муносабат бошланган. Жанжаллашиб қолдик ва мен уни пичоқ билан ўлдирдим. Кейин дўстим билан бирга жасадни бўлакларга ажратдик. Жасад қисмларини алоҳида пакетлаб, чамадон ичига жойладик. Сўнг тижорат таксиси билан Шишли туманига келдик ва жасад ҳамда унинг қисмларини турли ахлат контейнерларига ташлаб юбордик”, дейди у.
Гумонланувчиларнинг аэропортдан қочишга уринган пайтда қўлга олинган лаҳзалари ҳам тасвирларга тушган. Шунингдек, гумонланувчилар фойдаланган таксини бошқарган шахс ҳам қўлга олинган. Шу тариқа иш бўйича ҳибсга олинганлар сони 3 нафарга етган.
Мазкур воқеа ортидан 26 январь куни аёллар Туркиянинг Анқара ва Истанбул шаҳрида қотиллик ва жазосизлик сиёсатига қарши норозилик акцияси ўтказди.
