Туркиялик ишбилармон Ўзбекистоннинг Бухоро вилояти, Қоровулбозор туманидаги дашт ҳудудида ўлдирилиб, ўша ернинг ўзига устидан тупроқ тортган ҳолда ташлаб кетилди. Энг аҳамиятлиси, уни ўлдирганлар бегона эмас, ўз ватандошлари. Қотилликни содир этганликда гумонланган шахслар эса икки мамлакат ҳуқуқ-тартибот органларининг ҳамкорликдаги амалиёти натижасида Истанбулда қўлга олинди.
Гап шундаки, туркиялик тадбиркорнинг жонсиз жасади 2025 йил 17 октябрь куни Қоровулбозордаги даштда маҳаллий чорвадор чўпон томонидан устига тупроқ тортилган ҳолатда топилган. Жасад Туркияда бедарак йўқолганлик важи билан қариндошлари томонидан қидирувга берилган 49 яшар Қодир Тунчга тегишли экани аниқланган. Қотиллик қарз масаласи туфайли содир этилган, қўлга олинган 4 нафар гумонланувчи судга юборилган.
Ўзбекистон ҳуқуқ-тартибот органлари томонидан олиб борилган дастлабки тергов-суриштирув жараёнларида жасаднинг катта қисми чиригани, марҳумнинг пичоқлаб ўлдирилгани аниқланган. Суриштирувлар давомида ҳудуддан ўтган бир автомобилнинг давлат рақам белгисини аниқлаш имкони пайдо бўлган. Ўтказилган текширувда гумон қилинган автомобиль Истанбулда яшовчи Суат Т. (51) исмли турк фуқароси томонидан ижарага олингани маълум бўлган. Автомобилда ўтказилган текширувда қон излари аниқланган. Топилган қон намуналари жасадникига мос келиши ҳақида хуласа қилинган.
Ушбу маълумотлар асосида Истанбул Полиция бошқармаси ходимлари Суат Т. исмли шахсни кузатувга олди. Текширувлар давомида Суат Т.нинг ресторан очишни режалаштирган Қодир Тунч билан 2025 йил 28 май куни Ўзбекистонда учрашгани аниқланган. Қодир Тунчнинг бедарак йўқолгани ҳақида эса 2025 йил 3 июнь куни унинг амакиваччаси томонидан ариза берилган.
Полиция ушбу ҳолат юзасидан Ўзбекистондан келган ДНК намуналарини Қодир Тунчнинг фарзандларидан олинган намуналар билан солиштирган. Текширув натижасида Ўзбекистонда жасади топилган шахс Қодир Тунч экани тасдиқланган.
Жамоат хавфсизлиги бошқармаси Қотилликларни очиш бўлими ходимлари воқеа юзасидан олиб борган тергов ҳаракатлари давомида 4 нафар гумонланувчини, жумладан, Суат Т.ни ҳам қўлга олди. Гумонланувчилар полициядаги сўроқ пайтида қотилликни содир этганига иқрор бўлган.
Қотилликларни очиш бўлимида кўрсатма берган Суат Т. аввалдан таниши бўлган Қодир Тунч билан Ўзбекистонда ресторан очишга тайёргарлик кўраётганини айтган.
“Шартнома тузиш учун аввал мен ва икки дўстим Ўзбекистонга бордик. 2 кундан сўнг Қодир Тунч ҳам ёнимизга келди, бироқ шартнома тузилаётган пайтда келиша олмаганимиз учун бу ишдан воз кечдик”, дейди Суат Т.
Шартнома бекор бўлгач, автомобилда қайтаётганларида Қодир Тунч билан ўртасида тортишув чиққан.
“Мен машинани бошқариб бораётгандим, ёнимда Қодир ўтирганди. Бу шартнома учун унга 20 минг доллар пул бергандим. Шартнома амалга ошмагач, пулни қайтариб беришини сўрадим. У менга пулни сарфлаб юборганини ва қайтара олмаслигини айтди. Шундан сўнг орамизда жанжал чиқди”, дейди Суат Т.
Унинг айтишича, автомобилни бошқараётганда улар ўртасида бошланган муштлашув сабабли машинани тўхтатишга мажбур бўлган.
“Жанжал пайтида аниқ нима қилганимни эслолмайман. Ўзимни йўқотиб қўйган эканман. Бир пайт унинг қонга беланганини кўрдим. Бироздан сўнг у ўлди. Ваҳимага тушдик. Жасадни катта йўлдан бироз ичкарига олиб кириб, машинадан туширдик. Чуқур қаза олмадик. Устини тупроқ билан кўмиб, у ердан қочиб, Истанбулга қайтдик. Қотилликдан сўнг ижарага олган машинамизни топшира олмадик. Бир дўстимни Ўзбекистонга юбориб, унга машинани топшириши учун пул бердим. У қотиллик ҳақида билмасди. Автомобилни ижарага олган жойимизга топшириб, қайтиб келди”, дейди у.
