Тошкент шаҳрида муқаддам судланган 16 ёшли йигит яна жиноят содир этиб, уч йилга қамалди. Бу ҳақда “Миллар” дастурида хабар берилди.
Маълум қилинишича, уч нафар фуқаронинг автомашинасидан телефон ҳамда пулларни ўғирлаган 16 ёшли ўқувчи қамоққа олинди. 2009 йилда Сурхондарё вилоятида туғилган, ҳозирда Тошкент шаҳрида яшаб келаётган 16 ёшли ўсмир ота-онаси билан уришиб қолиб, уйидан чиқиб кетган.
2025 йилнинг 2 апрелида Яккасарой туманида содир этган жинояти учун Жиноят кодексининг 169-моддаси, иккинчи қисми ва “г” бандлари билан айбли деб топилиб, унга нисбатан жарима жазоси қўлланилган.
Орадан вақт ўтгач, йигит яна жиноятга қўл уриб, ойналари очиқ қолдирилган автомобиллардан пул ва телефон аппаратларини ўғирлаб келган. Ҳолат бўйича иш жиноят ишлари бўйича Чилонзор туман судида кўриб чиқилди ҳамда вояга етмаган судланувчига уч йил озодликдан маҳрум қилиш жазоси тайинланди.
