Жанубий Кореянинг Ҳвасон шаҳрида 30 ёшлар атрофидаги Ўзбекистон фуқароси 50 ёшли такси ҳайдовчисини калтаклашда гумон қилинмоқда. Ҳодиса 18 октябрь куни Хянгнам ҳудудида содир бўлган.
Маълум бўлишича, гумонланувчи ўз автомобилида ноқонуний равишда йўловчи ташимоқчи бўлган, маҳаллий такси ҳайдовчиси эса бунга тўсқинлик қилиб, ҳолатни ва қоидабузарликни суратга олмоқчи бўлганида жағ қисмига зарба берилган. Оқибатда такси ҳайдовчиси воқеа жойида ҳушини йўқотиб, ерга йиқилган. Автомобил кузатув камерасига муҳрланган тасвирларда тажовузкор ҳушсиз ётган фуқарони оёқлари ва муштлари билан калтаклашда давом этгани ҳамда унга биринчи ёрдам кўрсатмасдан воқеа жойидан ғойиб бўлгани акс этган.
Корея полицияси 22 октябрь куни видеокузатув камералари ёзувларини ўрганиш орқали гумонланувчининг шахсини аниқлаган. Тез орада у расмий сўроққа чақирилиши ва жабрланувчининг тиббий хулосаси натижаларига қараб унга нисбатан қўйиладиган айблов янада оғирлаштирилиши мумкин.
Маҳаллий ҳуқуқ-тартибот органларининг маълум қилишича, Ҳвасон шаҳрида Telegram гуруҳлари орқали ноқонуний йўловчи ташиш хизматларини кўрсатиш ҳолатлари кенг тарқалган. Жорий йилнинг май ойида ҳам бундай ноқонуний фаолият билан шуғулланган 29 нафар хорижликнинг, жумладан, ўзбекистонликларнинг ишлари прокуратурага оширилган эди. Йил охиригача полиция ва иммиграция хизмати ноқонуний ташувларга қарши биргаликдаги текширув ва назорат рейдларини янада кучайтиришни режалаштирмоқда.
