Бразилия Амазонкасига йўл олган сайёҳлар кемаси сафар бошланганидан атиги бир неча дақиқа ўтиб чўкиб кетди. Оқибатда икки киши ҳалок бўлди, етти киши бедарак йўқолди. Бу ҳақда Daily Mail хабар берди.
Ҳодиса 14 февраль куни Манаус шаҳридаги машҳур “Сувлар учрашуви” ҳудудида содир бўлган. Кема соат 12:30 да шаҳардан чиқиб, Нова Олинда до Норте томон йўл олган. Бироқ у Рио Негро ва Рио Солимоэс деб номланган иккита йирик дарё қўшилса-да, аралашмайдиган жойда чўкиб кетган. Кемада 70 дан ортиқ сайёҳ бўлган.
Воқеа жойидан олинган кадрларда аёллар, болалар ва эркаклар қутқарув жилетларида сузиб тургани, яқин атрофдаги қайиқлар эса имкон қадар кўпроқ одамни қутқариш учун шошилганини кўриш мумкин.
Чўккан кемадан жами 71 киши қутқариб олинган. Амазонас штати соғлиқни сақлаш департаменти уч ёшли Самила де Соуза вафот этганини маълум қилди. Қизалоқ яқин атрофдаги болалар шифохонасига олиб борилган, бироқ етиб келганида унинг ҳаётини сақлаб қолишнинг имкони бўлмаган.
Иккинчи ҳалок бўлган қурбон 22 ёшли Лара Бянка экани аниқланган. Унинг жасади соат 18:00 атрофида Манаус портидаги патрул бўлинмасига олиб келинган. Жабрланганларни қутқариш учун 25 нафар ёнғин-қутқарув ходими, учта қайиқ ва саккизта ўт ўчириш машинаси, шунингдек, полиция қайиғи ҳамда тез ёрдам машинаси жалб этилган. Бразилия ҳарбий-денгиз кучлари ҳам йўловчиларни қидириш учун дарё қутқарув гуруҳи ва вертолёт юборган.
“Ҳозирда биз бортда бўлган барча шахслар, жумладан, йўловчилар ва экипаж аъзолари билан боғланиб, маълумотларни тўлиқ масъулият ва шаффофлик асосида тасдиқлаш мақсадида конференс-алоқа ўтказмоқдамиз”, деди сайёҳлик кемаси оператори Лима де Абреу баёнотида.
Маҳаллий полицияга кўра, кема капитани эҳтиётсизлик оқибатида одам ўлимига сабаб бўлгани учун ҳибсга олинган, бироқ кейинчалик гаров эвазига озод қилинган.
