АҚШ Ҳарбий-денгиз кучлари ўтган ҳафта давомида Эрон Ислом Республикаси флотига қарши олиб борилган кампания доирасида Эроннинг 30 дан ортиқ кемасини, жумладан, 5 март оқшомида йирик дрон ташувчи кемасини чўктирганини маълум қилди. Бу ҳақда Euronews хабар берди.
АҚШ Марказий қўмондонлиги (CENTCOM) раҳбари, адмирал Бред Купер денгизда зарбага учраган Эрон кемасини тахминан Иккинчи жаҳон уруши давридаги авиачилар ҳажмидагидек деб таърифлади.
“Ҳозир биз гаплашаётган вақтда кема ёнмоқда”, дея қўшимча қилди Купер журналистларга.
Адмиралнинг сўзларига кўра, 6 март куни эрталаб B-2 stealth (кўринмас) бомбардимончи самолётлари Эрон ичкарисида яширилган баллистик ракета учириш қурилмаларига ўнлаб 900 килограмли “тешувчи” бомбаларни ташлаган.
“Шунингдек, биз Эроннинг Космик қўмондонлигига ҳам зарба бердик, бу эса уларнинг америкаликларга таҳдид солиш қобилиятини пасайтиради”, деди адмирал.
CENTCOM ёнаётган кеманинг оқ-қора тасвирларини эълон қилди. Маълум қилинишича, гап IRIS Shahid Bagheri кемаси ҳақида кетмоқда. Бу кема дронлар учун 180 метрли учиш-қўниш йўлагига эга бўлиб, у қайта жиҳозланган контейнер ташувчи кемадир. 2005 йилда фойдаланишга топширилган ушбу кема портларда ёнилғи қуймай 22 000 денгиз милини босиб ўтиш имкониятига эга эди.
Эрон ҳарбийлари ҳужумни дарҳол тан олмади, бироқ ташқи ишлар вазири Аббос Ароқчи АҚШ денгиз флотини Ҳинд океанида IRIS Dena фрегатини чўктириб, “денгизда ваҳшийлик” содир этганликда айблади. Мазкур ҳужум оқибатида камида 87 нафар экипаж аъзоси ҳалок бўлган. Шунингдек, Ҳиндистон денгиз флоти мезбонлик қилган (АҚШ ҳам иштирок этган) машғулотлардан қайтаётган ушбу кеманинг 32 нафар аъзоси Шри Ланка ҳукумати томонидан қутқарилган.
Вашингтонда чиқиш қилган АҚШ уруш вазири Пит Ҳегсет Эрон бўйлаб зарбалар кўлами кескин ошиши ҳақида огоҳлантирди:
“Бу кўпроқ қирувчи эскадронлар, кўпроқ имкониятлар ва кўпроқ бомбардимончилар деганидир. Ҳужумлар янада тез-тез амалга оширилади”.
Исроил ҳарбийлари 6 март куни эрталаб Теҳронга қарши кенг кўламли зарбалар тўлқини бошланганини эълон қилди. Гувоҳлар Исроил ҳаво ҳужумларини ўта шиддатли деб таърифламоқда, портлашлар овози уйларни ларзага келтирди.
Шунингдек, бир нечта ракета базалари жойлашган Кирмоншоҳ шаҳри атрофида ҳам портлашлар қайд этилган. Исроил томонининг даъво қилишича, зарбалар натижасида Эрон ҳаво мудофааси ва ракета учириш қурилмаларининг аксарияти йўқ қилинган.
Уруш кўлами бутун минтақага ёйилмоқда
Жума, 6 март куни эрталаб Эрон Америка қўшинлари жойлашган Кувайт, Қатар, Саудия Арабистони ва Баҳрайн ҳудудларига ракета ва дронлар билан ҳужум қилди. Қурбонлар ҳақида ҳозирча маълумот йўқ.
Айни пайтда Исроил Ливан пойтахти Байрутнинг жанубий чеккаларида ва бошқа ҳудудларда Эрон томонидан қўллаб-қувватланадиган “Ҳизбуллоҳ” нишонларига бир қатор ҳаво зарбалари берди.
Можаролар нефть етказиб бериш занжирини ва глобал авиақатновларни издан чиқарди. Сўнгги маълумотларга кўра, Эрон, Ливан ва Исроил расмийлари минтақа бўйлаб қарийб 1 400 киши ҳалок бўлганини билдирмоқда. АҚШ эса ушбу тўқнашувларда олти нафар аскарини йўқотди.
